USA-p ataasiarani piumasarisarsimavaa nunap inuii inangiinnarlugit sanaartorunnaaqqullugu; maannali soorluuna USAp nunanut allanut ministeriata, Hillary Clintonip, oqaatsini ilumoorukkai:
Præsident Barack Obamap Israelip ministeriunera USA-mi tikeraarmat erseqqissumik piumasaqarfigaa Kuup Killiup Sinaata nunataani israelimiut tiguagaanni sanaartortoqarunnaarnissaa.
- Sanaartortoqaqqissanngilaq, sakkutuut sassasissuni alapernaarsuiffeqassanngillat; nunami naatitsisoqassanngilaq. Taama erseqqitsigisumik USA-p nunanut allanut ministeria Hillary Clinton Israelip ministeriuneranut naalakkiivoq.
Israelip ministeriunerata Benjamin Netanyahup USA-mit naveersereerluni uternermini præsident Obamap Hillary Clintonillu piumasaqaataasa ilamerngi eqqortippai, tassalu sassasissumi sanaartornerit ataasiakkaannguit taamaatitikkamigik.
USA-p nunanut allanut ministeriata Hillary Clintonip Israelip soqutigisai pingaarnerutinnagit, sumiiffimmili pissusilersuutit inuppalaarnerusunngornissaat piumasaraa.
Palæstinamiut præsidentiat, Mahmoud Abbas, USA-p naalakkersuisoqarfiani Washingtonimi qanittumi tikeraaruni USA-llu naalakkersuisuilu taakkartugassatik nerriviup qaanut qaqinneqareersullusooq tikissaaq. Præsident Obamap palæstininamiut præsidentiat Abbas piumasaqaateqarfiginianngilaa, pingaartilluguli illuatungeriit - israelimiut palæstinamiullu - isumaqatigiissuteqartariaqarnerat; israelimiullu qisuariaqqaarnissaannik piumasaqaatitaqarluni.
Præsident Obama Igitsinimi illoqarfiit pingaarnersaanni Cairomi sapaatip akunnerata tulliani sisamanngornermi oqalugialerpat araabiamiut siuttuisa tusarnaarluarnissaat naatsorsuutigineqarsinnaavoq.