Taama neriorsuipput nammineq kajumissutsiminnik nipilersortitsiniartut imminut taagortut Ice Cool Rock Concert, taakkulu sunngiffimminni nipilersortartut inuppassuarnik tusarnaarteqarlutik nipilersornissaat periarfissinniarpaat.
Arfininngornermi juunip 20-anni Inussivimmi tusarnaartitsinersuaqassaaq, rockimik nipilersortartut nutaat pingasut nipilersussapput, soorluttaaq erinarsortartoq Karina Møller erinarsussasoq.
Ice Cool Rock Concert aamma siorna Namminersorneq pillugu taasisoqarmat nipilersornersuarmik tusarnaartitsinermik aaqqissuussipput.
- Pisortanit tapiiffigineqarata aaqqissuussivugut. Nipilersortitsinissatsinni 400.000 koruuninik missingersuuteqarpugut, taakkulu isilernermi akiliutinit aningaasaliisutinillu matussuserneqassapput. Sinneqartooruteqassagaluarutta Nuummi tullianik aaqqissuussinissatsinnut atorneqarumaarput, Hans Peter Kleemann aaqqissuussisunit oqarpoq.