Jonathan Motzfeldtip imigassarsigaangami Nunatta karsia akiliisittarpaa
Atuagagdliutini aqagu saqqummersussani tamanna allaaserineqarpoq. Takussutissiat hornorujulippassuit AG-mit misissorneqarsimapput, aviisimillu oqaluttuarineqarpoq nammineq atugassanik naalagaaffimmit akilikkanik arlaleriarujussuarluni imigassarsisoqartarsimasoq, pinaasersumullu arneriniarsimanerarneqarnermi kingunerisaanik Inatsisartut siulittaasuattut tunuartariaqalermat tamakku aatsaat taamaatissimasut.
Atuagagdliutit naapertorlugit Motzfeldtikkut katiffissiornerisa ilaat Nuummi Hans Egede-p Illuani 2002-mi nalliuttorsiutigineqarmat 10.000 koruunit Nunatta karsianit akilerneqarsimapput - Hans Egede-p Illua pisortatigoortumik ilassinninnernut taamaallaat atorneqartaraluarpoq. Namminersornerullutik Oqartussat korti akiliissutaat ilaquttanut ikinngutinullu tunissutinut AG naapertorlugu aamma atorneqartarsimavoq, soorlu imigassanut aalakoornartortalinnut timmisartumullu bilitsinut.
Jonathan Motzfeldtili AG-mut oqarpoq naatsorsuinikkut kukkusoqarsimassasoq.
- Ajortoqarpat aaqqiisoqartariaqarpoq. Soorunami naatsorsuinikkut ilaatigut kukkusoqartarpoq, takussutissanilli ullut tamaasa unga suliaqarneq ajorpunga. Arlaatigut kukkusoqarsimassappat, tamanna oqaloqatigiissutigissavarput. Aammami taama suleriaaseqarpugut, Jonathan Motzfeldt Atuagagdliutinut oqarpoq.