Puisinniariaatsimik EU-p akuerisinnaasaanik Canada siunnersuuteqarpoq
Nunat tamat akuerisinnaasaannik puisinniariaatsit malittarisassaanik Canadamiut immikkut ilisimasallit arfineq marluk siunnersuummik suliaqaput, taakkualu nunanut puisinniarnermik ingerlataqartunut nassiunneqassapput. Nunat puisinniarnermik ingerlataqartut pineqartut tassapput, Danmark/Kalaallit Nunaat, Finland Island Norge Sverige Rusland-ilu. Uumasut piujuaannartinneqarnissaat nunallu puisinniarnermik inuussutissarsiuteqartut qulakkeerfigineqarnissaat siunertaralugu malittarissasanik siunnersuusiortoqarpoq, taamatullu immap uumasuisa atugarissaarnissaat pillugu Amerikap avannaata Europallu akornanni allanik oqallittoqarnissaa siunertaralugu siunnersuusiortoqarluni.
Canada-mi senatorimut ilaasortaq Céline Hervieux-Payette nunat tamat akuerisinnaasaannik puisinniartarnermut malittarissassanik pilersitsinissamik suliniuteqartuuvoq
Nunat tamat akuerisinnaasaanik malittarisassanik pilersitsinissamut Europa suleqatiseraarput. Uumasut atugassaartinneqarnissaanik Europa illersuisuummat suliniuteqarnitsinnut Europa tapersersuinnginnissamut patsisissaqanngilaq.
Uumasut atugarissaartinneqarnissaat pillugu tamatta ilungersorpugut Céline Hevieux-Payette tusagassiuutinut nalunaaruteqarluni taamatut allappoq.
Puisinniartarnermut malittarisassat pillugit suliniuteqarneq tapersersorneqariarpat, malittarissassatut siunnersuusiat EU-mi inatsisartunut taamatullu Naalagaaffiit peqatigiinnut saqqummiunneqassapput.
Malittarisassatut siunnersuusiat pillugit paasisitsiniaasoqarnissaa pilersaarutaavoq, ilaatigut immikkut ilisimasallit ekspertit, piniartut, avatangiisit pillugit suliaqartut, uumasunik illersuiniaqatigiiffiit, naalakkersuinermillu suliaqartut paasissutissiiffigineqassallutik.