Atuakkat Ulluat iluatsillugu Nunatta Atuagaateqarfiata Peter Øvig Knudsen aggersarsimavaa, naallu maanna allamik atuakkiaqaraluarluni sulinngiffeqarallarluni nunatsinnut kajungerami atuakkiaminik oqaluttuariartorpoq.
Oqalugiareernerata kingorna radioaviisimit oqaloqatigaarput.
- Meeraallungali paasiniaasartuusaarneq nuannareqaara, eqqarsarpungalu immaqami tusagassiortunngorluni inuusutissarsiutigineqarsinnaasoq.
Blekingegadebandilu pillugu atuakkiakka marluusut saqqummermata meeraaqatigisimasama oqarfigaanga: "Meeraallutilli nuannaartorinninnerit piviusunngortippat".
Peter Øvig Knudsen, siorna Cavlingip nersornaasiuttagaanik pilerigineqaqisumik nersornaatisisoq Blekingegadebandeni pillugu marlunnik nersugaaqisunik atuakkiaqartoq oqarpoq.
Atuakkiai 320.000-inngorlugit maannamut tunisaareerput, atuakkioriaatsimillu nutarterisuulluni.
- Tusagassiortunit siullersaallunga pinerlunniaqatigiit Blekingegadebandi pillugu politeeqarfimmi allattugaatit misissorpakka, pissarsiaqarfigeqalugillu.
- Aalajangersimasumik sammiveqarnanga misissuereerama allallunga aallartippunga. Pingaarnerutippara saqqummersissallugu qanoruna pisoqarsimasoq, inuinuku taakku sulerisimasut. Paasivaralu ilisimasannit sivisunerusumik annertuneroqisunillu suliaqarsimanerat.
Allatat suliamut tunngasut qanoq annertutiginera siuningaaq ilisimasimasuugukku, qularnanngilaq nangaariarsimassagaluartunga.
- Maanga tikinnerma kingorna takusakka nuannaarutigeqaakka. Tikilluaqqusaasutut nuannerluinnartumik ilassineqarpunga. Meeraallungali oqaluttuarpassuarnik tusartarpunga.
- Tupigusuutigaaralu inuiaqatigiit taama ikitsigisut taama amerlatigisunik oqaluttuaateqarneri. Inuuninni pingaaruteqarsimapput, meeraallungalimi kalaallit frimærkiinik oqaluttuaannillu katersivunga. Kalaalllit Nunaat nunarujussuuvoq, inukitsoq, Peter Øvig Knudsen oqarpoq.