Nunat killiit siuttuisa Israel illerpaat
Oqaluttarfimmit sakkortuuliorluni Israel tassaanerarpaa ammip qalipaataanik immikkoortitsisutut, peqqarniitsumillu naqisimannilluni aqutseriaasilittut taammagu. Nunat tamat akornini naalakkersuinikkut ingerlariaatsimik ilisimatooq Marlene Vind nassuiaavoq.
Danskit aallartitaasa ersissutigisaat piviusunngorpoq. Tassalu Iran-ip præsidentiata sakkortoqisumik Israel saassutaraa, taamaasimmallu akerliullutik ataatsimiiffimmit aniallutik. Neriuutigineqarsimagaluarpoq oqaloqatigiinnikkut pisut taamaattut pinngitsoorneqarsinnaanerat. Pissanngatigineqarsimavormi Iran-ip præsidentia sakkortuuliorumaarnersoq, saamanerulluniluunniit oqaaseqarumaarnersoq. Tassali ilimagisaq eqquuppoq, nangagassaajunnaarluni sakkortuuliorluni oqaaseqarami.
Maanna apeqqutaalerpoq ataatsimeersuarneq ingerlaannassanersoq. Ilimagineqalerpoq nunat killiit ataatsimeersuarnermi peqataajunnaarnissaat. Maanna paasinarsivoq Naalagaaffiit Peqatigiit Inuit Pisinnaatitaaffiinik suliniuteqarnera isasuulersoq.
Ataatsimeersuarnermi siunertaagaluarpoq ammip qalipaataanik immikkoortitsisarnerit oqallisigineqassasut, maannali Kangiani Qiterlermi pissutsit salliutinneqalerput. Aammattaarli nunat killiit pingaartitaat Iran-imilu kisermaassilluni aqutsineq akioriissutaalerput. Taamaasimmat nunat killiit Kangianilu Qiterlermi pissutsit atuuttut pingaarnerutinneqalerput.
Ilisimatooq Marlene Vind taama oqarpoq. Maannali oqaatigineqarpoq europamiut aallartitaat ataatsimiiffimmut uteqqissimasut, danskilli nunanut allanut ministeriata Per Stig Møller-ip oqaatigaa Israel-imiunut akeqqersortoqaannarpat danskit aallartitaat ataatsimiiffimmit qimagussinnaasut.
