Aasianni politiit 69-inik ukiulimmut sapaatip akunnera kingullermi ujajaasimasunut ilisimannittussarsiornerat kinguneqarluarsimavoq.
Ilisimannittussarsioreernerummi kingorna innuttaasunit saaffigineqarsimapput, angutillu pingasut, tamarmik 20-it sinnerlugit ukioqartut, tigusarineqarsimallutik. Angutit tigusarineqartut sisamaat ukiukippallaarnera pissutigalugu iperarneqarsimavoq.
Angutit tigusarineqartut tallimanngormat eqqartuussivimmut sassartinneqarput, novembarillu sisamaata tungaanut tigummigallagassanngortinneqarlutik.
Angut 69-inik ukioqartoq ataasinngornerup marlunngornerullu unnuaani nalunaaquttap 02.00 - 02.12 akornanni Entreprenørfirmaet Egedesmindep inissiaataani Frederik Lyngep aqqutaani normu 16-imi ujajaaffigineqarpoq.
Ujajaasoqarnerani angutit inissiamut igalaamik aseruillutik isersimapput, inissiamilu najugaqartoq 69-inik ukiulik saassullugu, saassutereeramikkulu isaarissakkut qimaasimallutik.