Mexicomi nuna sisoormat inuppassuit matoorussaapput
Mexicop kujataata kippasinnerusortaani nuna sisoormat illut 300-it sinnerlugit amerlassussillit matoorussaapput inuillu 1000-it missaannik amerlassusillit ajunaarsimanissangatinneqarlutik.
Skrevet af Jaaku Lyberth
28. september 2010 13:46
Qaqqap sivingarnga 200 meterinik takitigisoq sisummat illut 100-it 300-lllu akornanni amerlatigisut sisuffigineqarput, Mexicomi naalagaaffiup Oaxacap guvernøria Ulises Ruiz oqarpoq.
Mexicomi naalagaaffimmi Oaxacami piffissami kingullermi siallerujussuarpoq, uuttortarneqarmallu aatsaat taamma annertutigisumik siallerluni.
Silap ajornera pissutigalugu aqquserngit aqqutigineqarsinnaanngillat taamaatumillu annaassiniarneq ajornakusoorluni, annaassiniartut oqaaseqartittagaat taamatut oqarpoq.
Annaassiniartut ajunaarfiusumut suli anngussimanngitsut nutaarsiassaqartitsiviit nalunaarput.
