Piniartutut inuuneq filmimi nutaami takutinniarneqarpoq
Piniartoq utoqqaq pillugu filmiliaq piviusulersaarut ”Qilalugarniaq” illoqarfinni assigiinngitsuni takutinneqartussanngorpoq. Silap allanngornerata kinguneranik piniariaatsit allanngornerat pisassiissutaasartullu piniartut inuunerannut qanoq sunniuteqartarnerat filmimi takutinniarneqarpoq.
23. september 2010 04:43
Anda Hansenip, ulluinnarni Aasiaat Tusaat TV-mi sulisup, filmi kiserluinnarmi aallaqqaataaniit naaneranut suliarisimavaa.
Filmiliamini politikerit imaluunniit atorfillit immikkut ilisimasallit sammineqanngilat. Filmiliaminili takutikkusussimavaa piniartup ulluinnarni inuunera, qanorlu aamma piniartut qulaatiinnarlugit aaliangiisoqartarnera.
Filmiliaq Qeqertarsuup tunuani nunaqarfeeqqami Kitsissuarsunni immiussaavoq.
Filmi Aasianni septemberip 30-anni takutinneqassaaq. Nuummi oktoberip aappaani pingajuanilu takuneqarsinnaavoq, Ilulissani oktoberip qulingiluaani, Sisimiormiullu novemberip sisamaani takusinnaassallugu.
