Persuttaasut suli kinaassusersineqanngillat
Aalisartup 26-nik ukiullip, Hans Peter Mørk Boysenip, Aasianni sakkortuumik persuttarneqarneranut atatillugu, Aasianni politiit suli paasisaqanngillat.
Persuttarneqarnera sakkortungaarmat Rigshospitaliliaanneqarpoq, maannalu suli ilisimmarani. Taamaattumillu politiinit apersorneqarsinnaanani.
Politiit ilisimavaat arnaq kalaaleq persuttaaffiup tungaanit ima nilliasimasoq: "Taamarsuarmi annersarnasiuk!"
Arnaq taanna politiit suli atassuteqarfiginngilaat, qinnuigaallu nammineerluni takkulluni oqarasuaatikkulluunniit politiinut saaffiginneqqullugu.
Arfininngornermi septembarip aqqarnanni ullaassakkut nalunaaqutaq sisamat qaangerlugit tanneq marlunngortoq, Aasianni ilinniarnertuunngorniat kollegiaata eqqaani Qaqqamumi saneqqutilersup angut persuttarneqarsimasoq naammattoorpaa.
Persuttarneqartoq napparsimmavimmit angerlartinneqareerpoq, saassunneqarninili eqqaamasaqarfiginagu.
Persuttarneqartoq neriniartarfimmit Nanumit unnuakkut marluk missaani anivoq, tamatumalu kingorna taxarluni Qaqqamut-mi ISS-ip hotelitut inissiaataanukarluni.
Saassussinermut atatillugu takunnissimasinnaasunik tusaasaqarsimasinnaasunilluunniit, Aasianni politiit ujaasipput.
Aasianni politiit oqarasuaatikkut 86 42 22-mut, tassa 86 42 22-mut saaffigineqarsinnaapput aamma politeeqarfigisaq qaninneq saaffigineqarsinnaavoq.