Nipilersortartut kattuffiat ilaasortaqarnerulerumavoq

INNK, Inuit Nunaanni Nipilersortartut Kattuffiat, ilaasortanik nalunaarsuileruttorpoq.

- Sinerissamut peqatigiiffeqarneranik paasiniaanitsinni paasinarsisimavoq peqatigiiffeqartoq kultureqarfimmulluunniit nalunaaruteqarsimanngisaannartunik. Peqatigiiffinngoraanni pisussaaffiuvoq kultureqarfimmut ataatsimeersuarnerup kingorna nalunaartoqartarnissaa, INNK-mi Jens Immanuelsen taarserlugu aggutsip 24-iani siulittaasutut ivertinneqartoq Johan Henningsen nalunaarpoq.

Siulersuisut inissitsiterneranni siulittaasup tullerilerpaa Elo Geisler, Aningaaserisoq Hanne Saandvig, Allatsi Juaaka Lyberth siulersuisunullu ilaasortaq Karl Mathiassen.

Upernaaq ilaasortat qassiunerit naatsorsorneqarmata eqqoriarneqarpoq ilaasortat 171-iusut. Nalunaarsukkalli ikippallaarujussuartut siulittaasup oqaatigaa.

- Nuummi Nipilersortartut peqatigiiffiat tallimaannarnik ilaasortaqartoq aamma paasivarput, naak Nuummi nipilersortartorpassuungaluartut, Taamaammat Nuummi Nipilersortartut ataatsimeersuassamaarmata soqutiginnittut ataatsimeersuartoqalerpat peqataaniaqqullugit kaammattorpavut, oqarpoq.

Aamma peqatigiiffik ingerlallualeriarpat aningaasaateqarfinnit taperneqartarnerata ingerlalluarnerulernissaa neriuutaavoq.

Sinerissami nipilersortartut peqatigiiffii ingerlasut aamma siornatigut peqatigiiffilerisarsimasut ilaat kattuffiup immersuiffissanik mailikkut nassissoreerpai. Immersuiffissallu ilaasortat kikkuunerinik immersuiffigineqareeriarpata piaartumik Kattuffiup allaffianut utertitsisoqassasoq Johan Henningsen oqarpoq.

Kattuffik suli allaffimmioqanngilaq, kisianni allakkatigut saaaffiginnittoqarsinnaavoq uunga INNK - Box 1783 – 3900 Nuuk.