Canadap issittortaa takutippaa

Stephen Harper Canadami ministeriuninngornermi kingorna ukiut tamaasa aasaanerani Canadap issittortaanut angalasarpoq.

Canadami naalakkersuisut issittumi politikkeqalernissamik nalunaarutaat, Canadap nunanut allanut ministerianit saqqummiunneqaqqammerpoq, taannalu pillugu ministeriuneq Canadap issittortaanut angalavoq.

Canadap naalakkersuisuisa nalunaarusiaanni qulequtaq pingaarneq tassaavoq Canadap issittortaata Canadamit pigineqartoq. Nunarsuarmiut paasitinneqartariaqarput Canadap issittortaa Canadamit pigineqartoq, tamannalu ministeriunerup Harperip angalanerani malunnarpoq.

Nunavummi nunaqarfimmi Eqaluttuutsiami issittumi ilisimasassarsiortut ilisimatusarfissaat 100 million koruuninik akeqartussaaq Harperip marlunngormat saqqummiuppaa.

Ilisimatusarfik issittumi pissutsit paasineqarnerunissaannik siunertaqarpoq, nunaqarfimmilu aningaasarsiornerup siuarsarneqarnissaanik siunertaqarluni.

Ministeriuneq Harper pingasunngormat Qaasuitsumut tikeraarnermini Canadamiut sakkutui Qaasuitsumi sungiusartut pulaarpai.

Ministeriuneq sakkutuunut tikeraanermini sikup qaani assilisippoq, tunuani Canadamiut erfalersui amuneqarsimallutik sikullu avataani Canadamiut sinerissami nakkutilliissutaat takuneqarsinnaalluni.

TV-qarfiup CBC-p nutaarsiassanik tusagassiisartua oqarpoq, Harperip taamaaliornermigut nunarsuarmiunut takutinniaraa, Canadap issittortaa tassaasoq Canadap pigisaa aammalu Canadap issittortaa sakkutuutigut pissaaneqarfigalugu illersugarigaa.