Qipoqqarmik pisaqartoq unioqqutitsissaaq
Tamaatut naliliivoq tuluit nunaanni arferit aarluarsuillu nungutaannginnissaannik suliniaqatigiiffik Whale and Dolphin Conservation Society. Arfanniarneq pillugu ataatsimiititaliarsuaq Kalaallit Nunaat qulingiluanik qipoqqartassikkamiuk qipoqqarniarneq oktoberip ulluisa 13-anni aallartittusatut aalajangiiffaa. Oktoberip ulluisa 13-at sioqqullugu qipoqqarmik pisaqartoq arfanniarneq pillugu ataatsimiititaliarsuup maleruagassiaanik unioqqutitsissaaq Sue Fishcer suliniaqatigiiffimmi Dolphin Conservation Society -meersoq oqarpoq.
Aalisarnermut Piniarnermullu Naalakkersuisoqarfik piniartut 13 oktober sioqqullugu qipoqqarniarnissaannik akuersissuteqarnerannut tunngavilersuutigineqarpoq, qipoqqaat immanut kiannerusut 13 oktober sioqqullugu ingerlaalereertarmata, qipoqqaallu maannakkut piniarneqanngippata piniartut qipoqqarnik pisaqarsinnaassanngimmata.
Pissutsit taamatut innerat pissutigalugu Kalaallit Nunaat arfanniarneq pillugu ataatsimiititaliarsuarmit paasineqarnissamik piumasaqarpoq, Sue Fisher oqarpoq. Qipoqqaat qulingiluat kalaallit piniartuinit pisarineqarsinnaanerat arfanniarneq pillugu ataatsimiititaliarsuup junip qaammataani Mexicomi ataatsimeersuarnerani akuersissutigineqarpoq. Kalaallit piniartui kingullermik qipoqqartassinneqarput ukioq 1986-mi.
Qipoqqaat pisarineqarsinnaanerat tallimanngormat aggutsip ulluisa 13anni akuersissutigineqarpoq, ukiup naanissaata tungaanut pisarineqarsinnaallutik tassalu ukiutoqqami decemberip ulluisa 31 ata tungaanut.
