Timmisartoq Boeing 757 Kununnguaq suli tunineqanngilaq
- Aap, suli Københavnimiippoq, Air Greenlandip ussassaarinermi pisortaa Christian Kjeldsen oqarpoq, timmisartorsuullu tuniniarneqaleruttornera uppernarsarlugu.
Air Greenlandip pisortaanerata Michael Binzerip, Air Greenlandip siulersuisuisa marsip ulluisa 26-anni ataatsimeersuarneranni oqaatigigaluarpaa timmisartoq Boeing 757 Kununnguaq tunineqarsimasoq. Kikkunnut qanorlu akilerlugu tunineqarsimanersoq Michael Binzerip taamanikkut oqaatigerusunngilaa.
Boeing 757-ip inunnik angallassiunnaarluni nassiussanik usisuulernissaa taamanikkut aamma ilisimatitsissutigineqarpoq.
Qaammatilli sisamat qaangiutereerput taama nalunaaruteqartoqarmalli, timmisartorsuarlu suli tunineqarsimanngilaq.
Boeing 757 Kununnguaq Københavnimi uninngatinneqarpoq, taarsiullugulu Air Finlandip timmisartuanik attartortoqarluni. Timmisartoq taanna Københavnip Narsarsuullu akornanni aasaanerani timmisartuussivoq, timmisartumillu Boeing 757 Kununnguamik timmisartuussiinnartoqarsimasuuppat Air Greenlandimut akikinnerussagaluarnersoq apeqqutaalerpoq, Christian Kjeldsenilli tamanna akerlilerpaa:
- Timmisartoq Boeing 757 Kununnguatut ittoq tuniniarneqaleraangami assigiinngitsorpassuartigut misilerarneqartarpoq, misissorneqartarlunilu. Soorlu aamma aserfallatsaalineqartarluni. Timmisartorsuup Københavnimi uninngatinneqarnissaa taamaattumik pissusissamisoorpoq, Air Greenlandip ussassaarinermi pisortaa Christian Kjeldsen naggasiilluni oqarpoq.
Air Greenlandip ukiup massuma ingerlanerani nalunaarutigigaluarpaa timmisartup Boeing 757-ip tunineqarneratigut sulisut 25-t soraarsinneqartariaqassasut.
