Greenpeace qillerinerit pillugit oqallitsitsiniarpoq
Misiliilluni qillerinerit Naalakkersuisunit akuerineqarnerat, Greenpeace-imit Namminersorlutik Oqartussanut naammagittaalliuutigineqartuarpoq.
Sisamanngorpat oqallinnissamut Katuami pisussamut, Greenpeacep Danmarkimi immikkoortortaqarfia qaaqqusivoq, Sermitsiaq.ag-mi taama allaaserinnittoqarpoq.
EU-p puisit amiinik eqqusseqqusiunnaarnera tallimanngorpat aggustip 20-anni atuutilissaaq. Avatangiisit pillugit Greenpeacep oqaaseqartartuata, Birgitte Lesannerip puisit amiisa oqallisigineqarnissaat aamma ammaffigineqarnerarpaa:
- 1980-ikkunni puisinniartarneq pillugu akerliunerput kikkunnit tamanit naluneqanngitsoq ilisimavarput. Canadamiut puisinniariaasiata aamma kalaallit puisinniariaasiata assigiinngissusaat aallaqqaammut immikkoortissinnaasimanngikkivut qularnanngilaq, Birgitte Lesanner, Sermitsiaq.ag-mut oqarpoq.
- Kalaallit puisinniartarnerat akerlerisimanngisaannarparput, tamatumunnga pissutaavoq puisinniarneq nungusaataanngitsumik ingerlanneqartarmat, Greenpeacep avatangiisit pillugit oqaaseqartartua taama naqissusiivoq.