Holland sakkutuuminik Afghanistanimit angerlarartitsilerpoq
Holland Afghanistanimi 2.000-inik sakkutooqartitsivoq, ukiunilu sisamani sorsoqataareerluni.
Sakkutuunik angerlarartitsisoqassaaq, naak USA-p aamma NATOp pisortaata Anders Fogh Rasmussenip Hollandimiut angerlarartitsinissaminnik ukiumik ataatsimik kinguartitseqqullugit piumaffigereeraluarai.
Taamatullu aalajangertoqarneranut nuannaarutiginnittut tassaapput Talibanit.
- Hollandimiut naalakkersuisuilu allanit naqisimaneqaratik taamatut aalajangiinerannik qamannga uummatitsinnit pisumik pilluaqquavut, Talibanit oqaaseqartitaat taama oqarsimanerarlugu, Ritzau nalunaarpoq.
Aammami Hollandimi namminermi, sakkutuunik angerlarartitsinissaq eqqortuunersoq isumaqatigiinngissutigineqarpoq.
Hollandimiu sakkutooqarnermik ilisimasalik oqarpoq, Hollandimiut sakkutuuisa suliassartik suli naammassisimanngikkaat.