Aningaasaliissutissat atorneqarneq ajorput

Tassami 27 millionit koruunit aningaasaateqarfiup minnerpaamik imarai, - taakkulu namminneq oqarnerat naapertorlugu - "Nunani Avannarlerni kulturikkut suliniutinut pitsaasunut - ajornanngippallu kalaallit suliniutaannut atorneqarusukkaluarput!".

Taamaalilluni soorlu Sverigimeersumik ilitsersuisoqarluni isiginnaartitsissusiorniartunut, Norgimi aalisartut pillugit saqqummersitserusuttunut imaluunniit Nunani Avannarlermiut akuleriissillugit eqqussornermik ilinniartitserusuttunut, aningaasarfiup pisortaa Karen Bue ima kajumissaarivoq:

- Kalaallinik aningaasaateqarfitsinnut qinnuteqartartunik suli amerlanerusunik perusuppugut, Nunat Avannarliit kulturimut aningaasaateqarfiat taamaalilluni Nunani Avannarlerni Killerni aamma Nunat Avannarliit sinnerini kulturikkut suleqatigiinneq nukittorsarneqarniassammat.

Suliniut Kalaallit Nunaannut attuumassuteqartoq ataasiinnaq aningaasaateqarfimmut siorna qinnuteqarpoq, tassalu qitinnermik pikkorissartitsinersuaq OuterVision Katuami aggustimi ingerlanneqartoq. Tamannalu aningaasaateqarfiup aningaasaateqarluartup sullugaa.

Qinnuteqarnissamut tullermut killiliunneqartoq tassaavoq februaarip aallaqqaataat, 2011-milu sisamariarluni qinnuteqartitsisoqartassaaq.