Sermersuumi sermimik qiperukkat
Nuup illoqarfiata qeqqani eqqaassutissat Amisut eqqaanni norskit sermimik ilusilersuisut issimik pissarsipput.
Sapaatip akunnerata ataatsip matuma siorna tamanna qularnarsimagaluarpoq kialluni sialleqattaarmat.
Ullunili kingullerni norskit sermimik ilusilersuisartut sulisinnaasimapput isumaavorlu sermimik ilusilersuineq ukiut tamaasa uteqqiattunngussasoq. Tamanna aallartinneqarpoq ullukinnerup nalliussineqartarnera malunnarsiseqqinniarlugu. Tassami kristumiussuseq sioqqullugu kalaallit ullukinnersiortartorsuusimammata.
Tassalu ullukinnerup malunnartittarnera Kommuneqarfik Sermersuup eqquteqqippaa tamannalu ilaatigut pissaaq ullumi sermimik ilusilikkat uleernerisigut.
- Piorsaanermut Ingerlatsivimmi kultureqarnermut immikkoortortaq ikumatitalisarluni nipilersortunillu siuttulerluni Kommuneqarfiup Allaffiata tungaanut ingerlaaqatigiissitsissaaq nal. 18.45. Sermimik qiperukkat nal. 19.00 missaani Amisut eqqaanni uleerneqassapput, taama Kommuneqarfik Sermersooq nalunaarpoq.
