Aatsaat taama sinneqartoortigaaq

Siornamut sanilliullugu 15,7 million koruuninik pitsanngorniarneruvoq, aqutsisoqatigiillu ilimagisaannit pitsaanerulluni, aviisi Sermitsiaq ullumi saqqummersoq taamatut allaaserisaqarpoq.

KNI kingullermik 1992-imi ukiup affaanut naatsorsuutiminik angusarissaaraami aatsaat taama angusarissaartigaaq.

Qeqertarsuup avataani Skotlandimiut uuliasiorfiata Cairnip misiliilluni qillerinerani KNI-p kiffartuussinerata isertitaqarneruneranik pissuteqarpoq.

Taamatuttaaq Pilersuisup niuertarfiisa pitsaanerusumik nioqqutissanik peqqumaateqarnikkut periutsimik nutaanik peqalernera angusarissaarnermut pissutaasunut ilaavoq.

Suliffeqarfiup tamarmiusup suliniuteqarneratigut pitsaasumik angusaqartoq, KNI-mi pisortaanerup Søren Lennert Mortensenip erseqqissarpaa.

KNI-p aqutsisuisa ukiup affaanut angusarissaarneq tunngavigalugu naatsorsuutigaat niueqatigiiffik 2010/2011-mi ukiumoortunik naatsorsuutimini 110 million koruuninik sinneqartuussasoq. Tassalu missingersuusiaaqqaartuniit 20 million koruuninik qaffasinnerulluni.

- Piffissami sivisuumi ataasiinnaasumik sulinissarput pingaarluinnartuuvoq. Ataasiarluni pitsaasumik angusaqarnissaq naammanngilaq. Assersuutigalugu suli pisariaqartipparput uuliasioqatigiiffinnut kilisaatinullu pilersuinissamut soqutiginartuunissarput, KNI-mi pisortaaneq Søren Lennert Mortensen aviisimi sermitsiami ullumi saqqummersumi taamatut issuarneqarpoq.