Gassimik aniasoorneq patsisaavoq
Qanittukkut aamma nalunaarutigineqarpoq, Norgep avataani uuliamik qillerivimmi Statoilimit pigineqartumi ukiormanna siusinnerusukkut taamatorluinnangajak pisoqarsimasoq, matumanili gassi aniasoq ikuallajaqisoq ikuallalersimanngitsoq.
Maannalu pisimasoq alla, tamanut nittartakkakkut eqqartorneqaqisukkut WikiLeaks-ikkut saqqummiunneqarpoq. Tamatumuuna BP-p qilleriviliaa pineqarpoq, amerikap sineriaani ajutoornersuaq ukioq ataaseq affarlu sioqqullugu pisimasoq taanna pisimavoq.
Tuluit aviisiat The Guardian naapertorlugu amerikamiut ambassadeannit paasissutissat isertuussat saqqummiunneqartut takutippaat BP-p gassimut suleqataasa ernumatigisimagaat suliffeqarfiup paasissutissanik isertuussinera pisimasumullu isertuusserpasilluni pissusilersorsimanera.
Qilleriviliami sulisut 212-it gassimik aniasoqarnerani qimagussortinneqarsimapput, paasissutissallu saqqummiunneqartut naapertorlugit nalaatsornerinnaavoq qilleriviap kingunerlutitseqaluni ikuallalersimannginnera.