Nipilersoqatigiit SUME pillugit filmiliortoqalerpoq
Ilitsersuisartup Inuk Silis Høegh-ip suliamillu ingerlatsisup Emile Péronardip, nipilersoqatigiit malunnaatillit oqaluttuassartaa filminngortinniarpaat.
Nipilersoqatigiit SUME siullerpaamik filmiliarineqarlutik oqaluttuarnissartik akuerisimavaat. Nipilersoqatigiit oqaloqatiginerisigut, assinik toqqortanik takutitsinikkut tusarnaartitsinerannilu filmiliornikkut, nipilersoqatigiit malunnaatillit oqaluttuassartaa takusassiarineqassaaq:
Oqaluttuarineqassaaq Sorø-mi 1972-imi SUME-p pinngorneraniit 1977-imi avissaarnerisa tungaannut, 1988-imi nipilersoqatigeeqqittalernerannit aammalu 1994-imi "Persersume"-mik saqqummerserteqqinnerannut ullumimullu nipilersoqatigiit inuttaat, naak ilaasa ukiut 60-it angoreeraluaraat, sulili nipilersortartut oqaluttuarineqassallutik.
- SUME-p oqaluttuassartaa nipilersoqatigiinnik kisimi oqaluttuaanngilaq. Oqaluttuassartaammi uagut kalaallit oqaluttuatsinnut ilanngunnikuupput, Emile Péronard oqarpoq.
- Filmi nipilersoqatigiinnik inuttaanillu pissanganartunik takutitsiinnanngilaq. Kalaallit Nunaata nutaaliap pinngorneranik aamma takutitsivoq: nunasiaataasimanerup qimanneranik Kalaallit Nunaannillu namminersortumik pinngortitsiniarnermik sulissutiginninnermik aamma takutitsineruvoq, Emile Péronard oqarpoq.
Naatsorsuutigineqarpoq 2012-imi filmip takuteqqaarneqarnissaa pissasoq. Filmiliornerit siulliit decembarip pingajuanni Nuummi nipilersoqatigiit tusarnaartitsineranni aallartissapput.
SUME-kkullu tusarnaartitsinerat kisimi nipilersoqatigiinnit tusarfiussanngilaq. Nipilersoqatigiinnik pilersitseqataasoq, Per Berthelsen, atuakkamik, SUME-kkunnit eqqaamaasalikkersaarummik, saqqummersitsilerpoq, aammalu nipilersoqatigiit nuutiliaat siulliit marluk 1973-imi 1974-imilu saqqummersut CD-nngorlugit saqqummersinneqalerput.