Pisortaq: Atorfillit unitsitsipput

Hans Peder Barlach Christensen oqiliallassimaqisoq akunnerit arlaqanngitsut qaangiuttut pisuusaartitsilluni ilisimannittunik sassartitsiffimmit Immap iluatigut kabeleqarfimmit Nuummiittumit, eqqartuussiviusumit, nikuippoq. Puisi A/S pillugu suliamut tunngasunik apeqqutinik ulloq naallugu tassani akisaqattaareerluni.

Hans Peder Barlach Christensen Puisi A/S-imi qaammatini arfineq pingasungajanni pisortaavoq, ullumilu, eqqartuussivimmi nassuiaanermini ilungersunartumik sulinerminit tunniutiinnarneranit, ukiut qulit sinnerlugit qaangiutereersullu nassuiaateqarpoq. Taamani pisortatut tunuarami ulloq ataaseq affarlu qaangiutiinnartoq Nanortalimmit aallarpoq. Nanortalimmit aallarsimatsiartoq Puisi A/S akiliisinnaajunnaarpoq.

Ullumi eqqartorneqartut pingaarnersaraat Namminersornerullutik Oqartussat 12 million koruuninik taamani qularnaveeqqusiisimanerat.

Ullumi killisiuisoqarmat, Namminersorlutik Qqartussat, Puisi A/S-imi pisortaasimasoq siulersuisunilu ilaasortaasimasut killisiorneqarput, aningaasanik amerlanerujussuarnik atorfissaqartitsinerminnik qularnaveeqqusiinermullu nalorninartunik oqaatiginnissimannginnerat pineqarluni.

Aningaaserivimmut Spar Nord-imut, aningaasanik atorniarnissamut qinnuteqaataasimasoq siulleq malillugu 17 million koruuninik atorfissaqartitsisoqartoq takuneqarsinnaavoq, Puisi A/S-imili siulersuisut ataatsimiinneranni aningaasanik atorfissaqartitsineq 12 million koruuninut apparneqarpoq. Hans Peder Barlach Christensenip eqqaamasorisai aallaavigalugit, Namminersornerullutik Oqartussat 12 million koruuninik taamani qularnaveeqqusiisinnanerarpai. Taamanna aallaavigalu nammineq naliliisimavoq 12 million koruunit naammassasut, tassa suliffeqarfiup aningaasanik isertitaqalernissaata tungaanut.

12 million koruunit taakku 1999-imi upernaakkut naammannerannut tunngaviuvoq Kinami nioqqutissiornerup aallartinnissaa. Taamanilu upernaakkut naliliineq aallaavigalugu puisip orsuanik nerisat tapiinik iisartakkanik Kinami tunisisoqartalerpat aatsaat Puisi A/S aningaasanik isaatitsilissasoq ullumi H. P. Barlach Christensen nassuiaavoq.

"Takorluuineq", Namminersorlutik oqartussat akiliisinnaajunnaarnermilu pigisat eqqartuussisuserisuata isumaannakkut pilersaarutitut takutinniagai puisip orsuanik kilomut 500 koruunilerlugit tuniniaasarnissamut takorluuineq piviusumik tunngaveqanngitsoq tunngavilersuutigaat.

H. P. Barlach Christensen oqarpoq, taamani Namminersornerullutik Oqartussani atorfillit 12 million koruuninik qulanarveeqqusiinissamut isummersoqquneqaramik mianersoqqusisimagaluartut, piumasaqaatigalugulu minnerpaamik suliap unitsikkallarneqarnissaa. Nalorninartut annertuallaarsimapput. Politikerilli suliamik unitsitsiumasimanngillat, unitsikkunikku suliartik ataqqinaatilik ajalusuussammat. Qaammatilli arlaqanngitsut qaangiummata suliaq unitsittariaqalerpaat. Unitsinneqarmalli 12 million koruunit tammareersimapput. Kiap tamanna akisussaaffigineraa, Puisi A/S pillugu suliap paasiuminaatsup tunngavigerpiarpaa.

H P Barlach Christensen ullumi eqqartuussisoqareernerata kingorna oqaaseqarusunngilaq. Aqagu ullaakkut killisiunerit ingerlaqqissapput, siulersuisut siulittaasorisimasaat maannalu folketingimi ilaasortaq Lars-Emil Johansen uppernarsaasuussaaq.