Assartuussineq pillugu innersuussutit saqqummilerput

Assartuussineq pillugu isumalioqatigiissitap innersuussutai pissanngatigineqaqisut maanna saqqummiunneqarnissaminnut piareeqqapput.

Innersuussutit naammassineqareerput, tallimanngorpallu apriilip aallaqqaataanni ulloqeqqanut saqqummiunneqarumaarlutik.

Nunatsinni angallannikkut attaveqaatit tamarmiusut inuiaqatigiit aningaasaqarnerannit isigalugu misissuiffigineqarnissaat siunertaralugu, Naalakkersuisut Assartuussineq pillugu Isumalioqatigiissitaq 2009-mi decembarimi pilersippaat.

Nunami taama isorartutigisumi 56.000-inillu inuttussusilimmi angalanniarnermi unammilligassat amerlaqaat, aningaasartuutit sapinngisamik amerlavallaannginnissaat unammilligassanut ilaalluni. Tamanna pillugu Naalakkersuisut tusagassiortunik katersuutsitsisarfianni, Isumalioqatigiissitap siulittaasuata Christen Sørensenip Isumalioqatigiissitap isumaliutissiissutaa pingaarnersiorlugu tallimanngorpat saqqummiutissavaa.

Assartuussineq pillugu Isumalioqatigiissitap innersuussutai tamanut ammasumik Ilisimatusarfiup oqalugiartarfiani tamatuma kingorna saqqummiunneqassapput, apeqqutinillu itisiliiffiusumik akissuteqarnissamut siulittaasoq Christen Sørensen piareersimassaaq.

Isumalioqatigiissitap isumaliutissiissutaa ilivitsuulluni aallaqqaammut qallunaatuinnaq nittartakkakkut www.transportkommissionen.gl -ikkut tallimanngorpat saqqummiunneqassaaq, kalaallisulli nutserneqarnera naammassippat aamma saqqummiunneqarumaarluni.

Assartuussineq pillugu isumalioqatigiissitaq tallimanik ilaasortaqarpoq.

Christen Sørensen Syddansk universitetimi ilisimatuujusoq siulittaasoraat, allallu tassaallutik direktør Vagn Andersen, Inuplanimi pisortaq Kristian Lennert, ingeniør Nick Nielsen aamma Kanukokameersoq Karl Davidsen.