Gaddafip inuunermi pilliutiginissaa qunuginngilaa

Libyalu nammineq qimanniannginnamiuk naqissuserlugu.

- Gaddafip oqalugiarnermini akerliuniat kisiisa naviinngilai, aammali nunat pissaanillit Kangianilu qiterlermi naalagaaffiit aarlerisaarpai, namminerlu inuunermi pilliutiginissaa eqqartorlugu.

Illumi 1986-imi USA-p qaartartumeeriffigisaaniussagunartoq Gaddafi oqalugiarpoq nunallu killiit sakkortuumik appisaluullugit.

Qaqugumulluunniit mumisitsinermi siuttuuvunga pisortatigullu præsidentitut taaguuteqanngilanga tunuarfigisinnaasannik. Manna uanga nunagaara Muammar tunuarnavianngilaq - taamatut oqaluutigaluni akerliuniat nunaminnik ataqqinnittuunnginnerarpai, aalakoornartumit ikiaroornartumillu sunnertissimanerarpai.

Iluarpianngitsutut oqalugiarnermini nutarteriniarnini aarlerisaarinerminik akunnileqattaarpai. Innuttat sinniisaannik isumalioqatigiissitat illoqarfimmilu siulersuisut pingasunngorpat pilersinniarlugit oqarpoq. Sakkutuut politiillu aamma akerliuniat unitseqqullugit peqquai, akerliuniallu qimitaassasut oqaatigalugu.

Libyami pingasunngormalli akerliuniarnerit sakkortusiartuinnavipput. Tripolimi inuit 62-it toqutaasimasut nunamilu tamani 233-it toqutaasimasut Human Rights Watch nalunaarpoq.

Libyap USA-mi aallartitaa ullumi tunuarpoq, Gaddafip kisermaassilluni naalakkersuinera tapersersoqqissinnaajunnaarnerarlugu oqarluni. Indiami, Bangladeshimi, Arabiamiut nunaanni naalagaaffiillu peqatigiiffianni aallartitat amerlanersaat aamma tunuarput. Tamarmik Gaddafip akerliunianut peqqarniippallaarnera pissutigineralugu tunuarlutik.

Gaddafip akerliuniat imaluunniit mumisitsiniat afrikami inuuniutigalugu sakkutuunit akiortippai. Siullermik Benghazimi kingornalu illoqarfiit pingaarnersaanni Tripolimi. Inuuniutigaluguli sakkutuut suminngaanneerpiarnersut qanorlu amerlatiginersut iluamik ilisimaneqanngilaq. Libyamilu naalakkersuisut oqarasuaatit internetikkullu aqqutit unitsinniaqattaarpaat.