Italiap avannaani illoqarfimmi Milanomi unnerluussisut, ministeriunerup Silvio Berlusconip maannakkorpiaq eqqartuussisunut sassartinneqarnissaa pisortatigoortumik piumasaqaatiginialeraa, unnerluussisut pisortaat edmondo Bruti Liberati oqarpoq.
Berlusconip nivissanik arlalissuarnik, ilaatigut marokkomiumik qitittartumik 17-iinnarnik ukiulimmik akiliilluni atoqateqartarsimasutut Milanomi unnerluussisutunnerluutiginiarpaat. Akiliilluni inunnik 18-inik ukioqalersimanngitsunik atoqateqarnissaq Italiami inerteqqutaavoq.
Maannakkut annertuumik eqqartorneqalersoq Berlusconip eqqunngitsuunerarpaa, akiliilluni atoqateqarnikuunani oqarluni, politikkikkullu malersuisut unnerluussiniaanerarlugit.
Atoqateqartarsimanini pillugit Berlusconip naalakkersuisooqatigiit akornannut katuullillu oqaluffiannut atassuteqarnera innarlerneqareerpoq.
Ministeriuneq Italiami pisuujunerpaat ilagisaat arlalippassuariarluni anngiortumik iluanaarniartarsimanini pillugit unnerluunniarneqartaraluarpoq, naalakkersuisulli siulittaasuattut inatsisitigut malersorneqarsinnaannginnini utoqatsissusiullugu eqqartuunneqartarani.
Nunamili naalakkersuinikkut aaqqissuussineq naapertorlugu eqqartuussiviup ungasinngitsukkut aalajangerpaa Berlusconi inatsisitigut malersorneqarsinnaasoq.