Sakkortunerusunik malittarisassaqalernissaa kissaatigaat
Canadami naggueqatigiit Inuit assigalugit, Issittup imartaani immakkut angallannermi sakkortunerusunik malittarisassaqarnissaa Siumup siulittaasuata Aleqa Hammondip kissaatigaa.
Skrevet af Elisa Isaksen
05. februar 2011 14:39
Aleqa Hammondip aamma IA-meersup Jane Petersenip, Inatsisartut nunanut allanut sillimaniarnermullu ataatsimiititaliaat sinnerlugu, sapaatip akunnerata siuliani Nunavummut tikeraarneranni, Nunavummi naalakkersuisut siulittaasuannik Eva Aariammik ataatsimeeqateqarneranni ilaatigut tamanna oqaluuserineqartoq, CBC Northip nittartagaani allaaserineqarpoq.
- Ukiuni aggersuni Qalasersuaq aasaanerani sikueruttalersussaavoq, umiarsuillu ilarpassui tamaani angalasalerumaartussat immami sikulimmi angalanissamut naleqquttuunngillat, Aleqa Hammond CBC Newsimut oqarpoq, issittumilu immakkut angallannermi sakkortunerusunik malittarisassaqarnissaa Nunavut peqatigalugu taassuma kissaatigaa.
