Qallunaat partiivi: Namminersornerup isumaqatigiinniutigeqqinnissaa siusippallaarpoq

Namminersornermut inatsisip allanngortinniarneqarneranut Inuit Ataqatigiit piumasaat, qallunaat politikeriisa iluarinagu oqaatigaat. - Siusippallaarpoq aamma ilissinnut ajoqutaaginnassaaq, taama Christiansborgimiit nipi tutsiuppoq.

Naalagaaffiup ataatsimoortumik tapiissutaasa iluarsiivigineqartarnerat Kalaallit Nunaanni akit allanngoriartornerannut malinnaasaraiqarpoq Danmarkimi akit malinnagit. Taamaasilluni naleerukkiartornerat uniitsinneqarsinnaaniassammat. Inuit Ataqatigiit qineqqusaartitaat taama oqarput. Ullumilu aamma tusagassiutinut nalunaarummi erseqqissaateqarput:

"Imaanngilaq Namminersormut Inatsit tamaat isumaqatiginninniutigineqalersaartoq kisianniliuna aningaasanut tunngasortai oqallisigineqaqqullarigut. Tassa inatsisaasup sorpassuarnik imallip ilamineerannguanik oqallisiginninneq".

Taamaasiortoqarsinnaanngitsorli Birthe Rønn Hornbech oqarpoq.

- Inatsisip isumaqatigiinniutaanera ajornarsimaqaaq. Inatsisinik allannguineq anguneqassagaluarpat, Kalaallit Nunaata qanoq inissisimanissaa nalunartorujussuanngussaaq. Allannguinermi Kalaallit Nunaannut tamanna ajornermik kinguneqarsinnaalluarpoq. Tamannalu nuannernavianngilaq, Birthe Rønn Hornbech Kalaallit Nunaat pillugu ataatsimiititaliami ilaasortaq aamma Namminersorneq pillugu isumalioqatigiissitami ilaasortaasimasoq taama oqarpoq.

Dansk Folkepartii isumaqarpoq, inatsimmik nutarsaasoqassappat ilimagineqartariaqartoq uuliamik isertitat nutaamik isumaqatigiissusiorfigineqartariaqartut.

- Isumaqatigiissut imaaliallaannaq allanngortinneqarsinnaanngilaq. Allanngortinniarneqassagaluarpalli isumaqatigiissutaareersut ajornermik allanngortiterneqarnissaat qanittuarakasinngussaaaq, soorlu uuliasiornermi isertitaasinnaasut agguarnerisa amerlassusaat eqqarsaatigiinnarlugilluunniit. Tassa imaappoq, isumaqatigiinniarneq ammaanneqarpat nutaamik isumaqatigiissusiortoqartariaqassaaq, Dansk Fokepartiip Kalaallit Nunaat pillugu oqaaseqartartua Søren Espersen oqarpoq.

Nunatsinnit Demokraatit isumaqarput nutaamik isumaqatigiissusiorniarnermi aningaasaqarneq Inuit Ataqatigiinnit eqqarsaataanngitsoq, isummanilli pigiliussanik aallaaveqartoq. Demokraatit isumaqarput, nutaamik isumaqatigiissusiortoqassappat Nunatta avataanit isigineqarnera innarlerneqartussaasoq.

Nunatta avataanit isigineqarnera innarlerneqassagunanngitsoq Dansk Folkepartiimit ilimagineqanngilaq, taamaattorli taakku isumaqarput allannguiniarneq ernumanartuusoq.

- Oqarnianngilanga Kalaallit Nunaata isigineqarnera innarlerneqarsinnaasoq, kisiannili tupigaara isumaqatigiissut taama sukumiitigisumik sulianeqareersorlu, piffissarlu taama sivikitsigisoq ingerlareersoq allanngortinniarneqassagaluarpat tamannalu ernumanarpoq, Søren Espersen oqarpoq.

Folketingimi partiit saamerliit aamma isumaqarput, inatsimmik allannguiniarneq siusippallaartoq. Socialdemokraatinit Mogens Jensen ima oqarpoq:

- Namminersornermut inatsit, isumalioqatigiissitap suliaraa piffissaaq sivisuupilussuaq atorlugu. Isumaqarpunga maanna siusippallaartoq inatsisip isumaqatigiissutillu allanngortinnissaa anguniassallugu. Soorunami kissaatigisat oqaloqatigiissutigineqarsinnaapput qulaajarlugillu, taamaattoq uanga isumaqarpunga tamanna siusippallaartoq, Socialdemokraatinit Nunarput pillugu oqaaseqartartoq, Mogens Jensen taama oqarpoq.

Kommentarer



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl

KNR TV: TekstTV

Tjek information her:

TTV s 113 Dagligt opdaterede nyheder

TTV s 400 Flyinformation ankomst/afgang

TTV s 350 TV oversigt

TTV s 610 Radio oversigt