Kunngikkormiut: Prins Joachim pisup kingorna ajunngilaq
Prins Joachimip qaratsamigut milittoornermi kingorna suliaritereerluni maanna inuttaa ajunngitsoq.
Kunngikkormiut Ritzauimut nalunaarutigaat.
- Prins Joachimip peqqissusaa ajunngilaq. Qujanartumik piffissaatillugu prins toqqissinartumik qaffasissumillu pitsaassusilimmik suliaritippoq. Maannalu ajunngitsumik kinguneqartoq, kunngikkormiut tusagassiisartuat Lene Balleby taama allaaserisaqarpoq.
AAMMA ATUARUK Prins Joachim Frankrigimi napparsimmavimmi uninngasoq
Prins Joachim Frankrigimi Toulousep napparsimmavissuani tallimanngornermi unnukkut unitsitaavoq.
Tassanilu qaratsamigut milittoorsimammat qaratsamigut suliaritippoq, suliaritinnera iluatsilluarsimasoq kunngikkormiut arfininngornermi unnukkut nalunaarput.
Prins maanna suli napparsimmavimmi uninngasoq ullumi paasivarput.
- Prins Joachim taamatut inissisimatillugu qanoq sivisutigisumik uninnganissaa oqaatigissallugu suli siusippallaarpoq , Lene Balleby oqarpoq.
Prins Felix ullualunnguit qaangiuttut juulip 22-ani 18-iliilluni inuuissiormat ilaqutariit Frankrigimi, Château de Cayximi, Dronningip vinslottiani nalliuttorsiutigeqqammerpaat.
Prins Joachim tallimanngormat unitsinneqarmat ilaqutariit suli feriarlutik Château de Cayximiipput.
51-inik ukiulik prins Joachim sakkutooqarnikkut pilersaarusiornermi aqutsisutut ilinnarnini nangikkiartorlugu Frankrigimut siorna nuunniarluni aalajangerpoq.
Inuit ilisimaneqartut, innuttaasullu Prins Joachimip suliaritinneranut tunngatillugu peqqissilluarnissaanik kissaallugu inuulluaqqusipput.