Andreas Uldumip kommunit aningaasaqarneranut isumani allanngortippaa
Kommuninut nalimmassaanermut aaqqissuusseqqinnissaagallartumut Inatsisartunngorlaat aqagu immikkut ittumik ataatsimiinnermi qinersissutigissavaat, tassani kommunini pisuut pissakinnerillu naligiinnerulernissaannut, Demokraatit Naalakkersuisuutitaqartut ilaattut akuersissutigissavaat.
Demokraatit siulittaasuata maannalu nunatta aningaasaqarneranut aatsitassanullu akisussaasuunerpaalluni naalakkersuisungorlaap Andreas Uldumip akerlerisani akueritinnissaa suliassaani siullinngorpoq. Naalakkersuisuusimasut kommunillu siumukkunnit aqunneqartut pingasut siunnersuutaat illoqarfiit pingaarnersaanniit ilasilluni 25 million koruuninik kommuni kujallermut qaasuitsup kommuniatalu karsiannut nuusseqqinnissaq aqagu immikkut ittumik qinersissutigineqassaaq. 25 million koruunit qaavisigut 20 million koruuninik kommunit annersaasa tulliata akiliutiginerussavaat.
- Massakkut Aningaasaqarnermut aatsitassaqarnermullu Naalakkersuisuuvunga nunarput tamakkerlugu. Taamaammat apeqqutaavallaanngilaq siuliani suut suliarisimanerikka, nunarput tamaat sullippara uani, Andreas Uldum oqarpoq.
Aamma atuaruk ATAATSIMUT ISIGALUGU Kommunini nalimmassaaneq
Kommuneqarfik Sermersuumi illoqarfinniit Nuuk, Paamiut, Tasiilaq, Illoqqortoormiut tamarmillu nunaqarfiiniit aningaasanik amerlanernik annissuineq akerleralugu septembarimi kommuni viceborgmesteriuffigisani Andreas Uldumip KANUKOKA-miit ilaasortaajunnaarsippaa, ullumikkulli allarujussuaq naapitassaavoq. Taannami ullumikkut allatut isummeriaaseqalersimalluni politikeritut inissisimavoq:
Nalimmassaanissamut aaqqissuusseqqinnissamut siunnersuutip akuerineqarnissaa sukataarutigissaviuk?
- Tassami saqqummiussara attappara. Taava paasinarsissooq Inatsisartut qanoq aalajangissanersut, taassuma kingorna suliassakka nalussanngilakka suussanersut, Andreas Uldum oqarpoq, oqaatigalugulu siunnersuutip isikkuatut akuereqqullugu sukataarutigissallugu.
Suli aalajangiussivinngilagut
Demokraatit allatut isummernerat aamma aningaasaqarnermut ilaasortaatitaanit Tillie Martinussenimit ersersinneqarpoq. Politikki naapeqatigiiffiuvoq, taamaattumik demokraatit aqagu kommunini siumumit aqunneqartunut millionerpassuit akuersissutigissavaat:
- Aqagu susoqarnissaa takoqqaariartigu, suli aalajangiussivinngilagut. Kisianni soorunami Naalakkersuisooqatigisatsinnut akerliunavianngilagut.
Pissaanermik tigummiaqalernerminniit siullerpaamik aqagu demokraatit akerliuffigisimasartik akuersissutigisussanngoramikku qinersisumi pakatsisinnissai Tillie Martinussenip ersiginngilaa. Kingusinnerusukkut demokraatiniit anguniakkatta politikkikkut ersersikkumaaratsigit, taanna oqarpoq.
- Qinersisigut tamarmik pakatsinavianngillat. Naalakkersuisooqatigiit ataatsimoorlutik anguniagaanni demokraatit politikkikkut suliariumasai arlalippassuit ilaammata, Tillie Martinussen oqarpoq.
Maannakkut ernumassutissaqarpasinngilaq
Nunatsinni inuussutissarsiutitigut unikaallatsitsisinnaanissaa kommunimit ineriartortitsisumiit Sermersuumiit millioninik ilanngaanissap ernumassutaalluni aappaagumit millionilikkaanik nalimmassaanissap annertuneruleriartornerata akerliussutigineqartut ilagaat. Andreas Uldumili ukiaq ernumaqisoq maannakkut ernumassutissaqarpasinngilaq.
Politikkerinikuusannut akerliusumik nunattalu aningaasaqarneranut eqquinerlussinnaasumik maanna aalajangiivutit, tamanna qanoq oqaaseqarfigisinnaaviuk?
- Uani uanga eqqarsarusunngilanga ajornartorsiut siorngerlugu takoreerlugu. Takorusunneruara oqaloqatigiinnikkut pitsaanerpaat tamanut inooqataaffigineqarsinnaasoq ineriartortitsilluartorlu anguniassallugu, Aningaasanut Aatsissanullu Naalakkersuisoq Demokraatit siulittaasuat Andreas Uldum taama oqarpoq.
