ATAATSIMUT ISIGALUGU Kommunini nalimmassaaneq

Kommuneqarfik Sermersooq pilersaarutit malillugit 56 millionit koruuninik pilliuteqassaaq, Qeqqata Kommunia 12 millionit koruuninik pilliuteqassalluni.

Illuatungaatigullu Qaasuitsup Kommuniata missingersuutai 46 millionit koruuninik ilaneqassapput, Kommune Kujalliullu missingersuutai 22 millionit koruuninik ilaneqassallutik.

AAMMA ATUARUK Kommuneqarfik Sermersooq pilliuteqarnerpaassaaq

Kommuneqarfik Sermersuup borgmesteriata Asii Chemnitz Narupip kommunimi aningaasaqarnera, sulisut innuttaasullu pillugit ernumasupilussuuvoq.

- Ernumanarpoq. Nalimmassaarineq taamatut iluseqartillugu akuersissutigineqassappat Kommuneqarfik Sermersuumi innuttaasut sakkortuumik eqqugaassaapput. Tamanut annertuumik eqquisussamik sipaarniuteqartariaqalissaagut, borgmester Asii Chemnitz Narup juulip qulingiluaani oqarpoq.

AAMMA ATUARUK Asii Chemnitz Narup: Siunnersuut ernumanartoqarpoq

Borgmesteri Sulisitsisut Peqatigiiffiannit GA-mit taperserneqarpoq, taakkumi isumaqarput kommunit ineriartorfiusut missingersuutaannik ilanngartuineq pingaarnersiuinerlunnerusoq.

- Nuuk tassaavoq angusaqariartorfiusoq, Nuuk suliffinnik aallarnisaaffiuvoq. Suliffeqarfiit inerisimasut Nuummiipput, Kalaallit Nunaanni Sulisitsisut peqatigiiffiata siulittaasuata tullia, Martin Ben Shalmi, oqarpoq.

AAMMA ATUARUK Nalimmassaarinikkut inuussutissarsiorneq toqutaassaaq

Aningaasaqarnermut Nunami namminermullu naalakkersuisoq Siumumeersoq, Vittus Qujaukitsoq, isumaqarpoq Kommuneqarfik Sermersooq pilliuteqarnerusariaqalersoq.

- Kommeqarfik Sermersooq ukiuni kingullerni nunap sinneranut tunniussaqarpallaarsimanngilaq, naak kommunip isertitaasa ilarujussui ingerlatsivinnit inuiaqatigiit pigisaanneersuugaluartut, Qujaukitsoq KNR-imut juulip 21-ani taama oqarpoq.

Vittus Qujaukitsup Qanoruumi apersorneqarnera uani isiginnaarsinnaavat.

Kommuninut aningaasanik agguaasseqqinnermi Qaasuitsup Kommunia pissarsinerpaassaaq, missingersuutai 46 millionit koruuninik ilaneqassammata. Tamatuma saniatigut aalisakkanik suliffissuaqarneq ingerlallualaavissorpoq, ukiuni kingullerni tallimani tunisat milliardip pingasorarterutaanik qaffassimallutik. Allatut oqaatigalugu, Qaasuitsup Kommunia akileraarutitigut isertitaqarluarnissaminut periarfissaqarluaraluarpoq.

Kisitsisit Naatsorsueqqissaartarfimmeersuupput, taakkulu aamma takutippaat tunisineq kommunit sinnerini pingasuni 21 procentinik appariaateqarsimasoq.

AAMMA ATUARUK Qaasuitsup Kommunia iluanaartorsuuvoq

Qeqqata Kommuniani isumaqarput nalimmassaanissamik isumaqatigiissuteqarniarnermi piumasaqaatitik tusaaniarneqarsimanngitsut. Taamaammaat borgmesterip Hermann Berthelsenip (S) erseqqilluinnartumik akueriumanngilaa.

- Kommunit allat aggustip sisamaani ataatsimeeqatigisussaagaluarpagut, nalimmassaanermik iluarsartuusseqqinnissaq kisiat qulequtaralugu. Tamanna pinngitsoortussatut maanna isikkoqarpoq.

- Taamaammat isumaqarpunga piumasaqaativut kissaativullu akuerineqarsimanngippata Qeqqata Kommuniata siunnersuutigineqartoq kingulleq, ilaatigut Qeqqata Kommunianit 12 millionit koruuninik pilliuteqarfigisassaat, akuerisinnaanngikkipput, Bertherlsen erseqqissaavoq.

AAMMA ATUARUK Nalimmassaanermik iluarsartuusseqqinnissaq Hermannip akueriumanngilaa

Ittoqqortoormiit Kommuneqarfik Sermersuumi illoqarfiit minnersaraat. Nunaqarfinni avinngarusimanerusuni pissutsit pitsanngorsarniarlugit Kommunip suliniuteqarnera, assersuutigalugu maannakkut inissiat 36it iluarsaannissaannut aningaasaliissuteqarniarnera iluarusuutiginikuuaat.

Atassulli sinnerlugu kommunalbestyrelsemi ilaasortap Erling Madsenip aarleqqutigaa, nammineq najugaqarfimmini sanaartorneqaleraluartut tamarmik annaaneqarnissaat.

- Tamanna aarlerinarpoq. Aatsaat neriuutissaqarnissatsinnut pissutissaqarsorileruttorluta taamatut pisoqarmat, Erling Madsen qarpoq.

AAMMA ATUARUK Ittoqqortoormiormiut Aaleqquteqarput

Kommunalbestyrelsemi ilaasortap Peter Davidsenip (Siumut) Vittus Qujaukitsoq, Nunami Namminermi Aningaasaqarnermullu Naalakkersuisoq kaammattorpaa, nalimmassaaneq nutaaq unitsiinnaqqullugu.

- Kommuneqarfik Sermersuumut nutsertoqartuarmat aningaasartuutit qaffakkiartortuartut nalunngilarput. Taamaakkaluartorli isertitat annertuserianngillat. Taamaammat Kommuneqarfik Sermersooq taama amerlatigisunik akiliisassappat tamanna isumakulunnartoqarpoq, maalaaruteqarnissamut killiliussaq ullunik arlaqanngitsunik sioqqullugu taanna taamatut oqaaseqarpoq.

AAMMA ATUARUK Kommunalbestyrelsimi ilaasortaq: Nalimmassaariaaseq nutaanngitsoq atortariaqarparput

Matumani qupperneq illuatungeriinnit oqaatigineqartunik ingerlaavartumik nutarterneqartarumaarpoq.