Royal Greenlandip siulersuisui ingerlaqqiinnassasut
Royal Greenlandip 335 millionit koruuninik sinneqartooruteqarluni aatsaat taama angusarissaartigivoq, tamannalu siulersuisuni siulittaasumit Niels Harald de Coninck-Smithimit pisortaanermillu Mikael Thinghuusimit piginnittunut - Namminersorlutik Oqartussanut - saqqummiunneqarpoq.
Naalakkersuisut siulittaasuat, Kim Kielsen, Namminersorlutik Oqartussat sinnerlugit ataatsimeersuarnermi peqataavoq angusallu iluarisimaarpai.
AAMMA ATUARUK Kinamiut 38-t Royal Greenlandimi tunisassiorneq ataavartissagaat
Ingerlatseqatigiiffiup siuttui sulisuilu suliamut angisuumut angusanullu Kim Kielsenip qujassuteqarfigai.
Naalakkersuisut siulittaasuata ilaatigut Royal Greenlandip Canadami Quin-Sea Fisheriesimik pisinermigut Amerikami avannarlermi niuerfimmi suliaqalersimanera immikkut eqqaavaa.
Ingerlatseqatigiiffiup pisortaanerata Mikael Thinghuusip saqqummiinermini oqaatigaa Amerikami avannarlermi kaaviiartitat Royal Greenlandip kaaviaartitaata tamarmiusut maanna 6 procenterileraat. Annertugisassaanngilaq, aallartinnertulli isigisassaavoq, pisortaaneq taama oqarpoq.
AAMMA ATUARUK Royal Greenlandip sulisui Nunatsinnut nuunneqarnissaat Siumup kissaatigigaa
Nunatsinni 1400-nut suliffissaqartitsisoq
Kalaallit inuusuttut suli amerlanerusut Royal Greenlandimi atorfeqalersinnaanerat aalisarnerullu iluani ilinniagaqalersinnaanerat neriuutigalugu Kim Kielsenip aamma oqaatigaa.
Kim Kielsenip Naalakkersuisullu angusat pillugit iluarimaarinninnerat aamma ersersinneqarpoq siulersuisut - ukiut tamaasa toqqagaasartut - toqqagaaqqinnerisigut, aamma Namminersorlutik Oqartussanut 100 millionit koruuninik agguagarsisitsisoqarnissaanik siunnersuut akuersissutigineqarpoq.
Royal Greenland aamma oqallinnermik pilersitsivoq, suliffeqarfimmi kinamiunik aalisakkerivinni sulisussanik tikisitsiniarmat.
Tamannalu ataatsimeersuarnermi aamma oqaluuserineqarpoq, siulersuisut siulittaasuata Niels Harald de Coninck-Smithip taamatut iliuuseqarnissaq pisariaqartutut taammagu.
AAMMA ATUARUK Royal Greenland naatsorsuutitigut aatsaat taama angusarissaartigisoq
Pisortaanerup Mikael Thinghuusip aamma erseqqissaatigaa Nunatsinni suliffiit ukiut tulleriisiinnarlugit 200-t missaanik amerleriaqqissimasut, Royal Greenlandilu taamaalilluni Nunatsinni inunnut 1400-nut maanna suliffissaqartitsisoq.
Kim Kielsenip ataatsimeersuarneq naammassimmat KNR-imut oqaatigaa ingerlatseqatigiiffiup nunaqavissunik suliffissuarni sulisoqarnissaa orniginarnerugaluartoq - tamannali anguneqarsinnaanngippat Royal Greenland allanik aaqqiissutissarsiortariaqartoq.