Kinamiut 38-t Royal Greenlandimi tunisassiorneq ataavartissagaat
Kinamiut 38-t Royal Greenlandip tunisassiorfiini pingasuni Nunatsinniittuni sulilertussanngorput. Taamaalilluni Royal Greenlandip sulisussaaleqisarnini iliuuseqarfigaa.
Kinamiut 38-t suliartortitassat illoqarfinni pingasuni agguataarneqarlutik sulilissapput. Taakkunannga 19-it Maniitsumi, qulit Qasigiannguani qulingiluallu Uummannami sulissallutik.
Sulisussat maajip qiteqqunnerani juunillu qiteqqunnerani tikissapput.
- Tunisassiorfinni ataavartumik tunisassiornerit taamatuttaaq aalisartut pisaminnik sukkanerusumik tunisaqarsinnaanerannik kinguneqartumik suliassaminnik naammassinnilluarlutik sulisarnissaat neriuutigalugillu isumalluarfigaagut, suliffeqarfissuarmi sulisoqarnermi ingerlatsisoq Søren Olsen Damgaard tusagassiuutinut nalunaarummi oqarpoq.
Kinamiunik 38-nik suliartortitsisoqarnissaa Qeqqata Kommunianit Qaasuitsullu Kommunianit akuersissutigineqareersoq, suliffeqarfik ilisimatitsivoq. Aamma nunani allaneersunut aqutsisoqarfimmit, Kinamiut tikisinniakkat tamaasa Kalaallit Nunaanni najugaqarsinnaanissaat sulisinnaanissaallu akuersissutigineqareersoq oqaatigineqarpoq.
AAMMA ATUARUK Royal Greenland sulisunik Kinameersunik tikisitsiniartoq
- Nunanit allaneersunik suliartortitsisariaqarnitta takutiinnarpaa tunisassiorfinni suliassarpassuaqartoq. Ulapaarfimmi sulisinnaasut amerlanerujussuit pisariaqartippavut, aallartiffeqartariaqarattali taamatuttaaq isumaqaratta amerlavallaartunik suliartortitsineq pissusissamisuunngitsoq Kinamiunik 40-ngajannik suliartortitsinissarput aalajangerparput. Ulapaarfik qaangiuppat allatigut qanoq iliornissarput aalajangissavarput, Søren Olsen Damgaard oqarpoq.
Kinamiut tunisassiorfimmi sulisutut Royal Greenlandimut suliartortussat illunilu Royal Greenlandimit pigineqartuni inisimasussat 38-usut Kalaallit Nunaanni najugaqarnissamut sulinissamullu allagartatik Nunanit allanit nunasiniartunut aqutsisoqarfimmut ukiut tamaasa nutartertikkiartortassagaat, Royal Greenland ilisimatitsivoq.
Royal Greenland Maniitsumi Uummannamilu innuttaasunik apriilip naalernerani ataatsimiisitsissaaq, ataatsimiisitsinernilu Kinamiunik tunisassiorfimmut suliartortitsinermut tunngavigineqartut ilisimatitsissutigineqassapput.