Venstre: Naalakkersuisuni eqqissiviilliortoqarnera ajuusaarnarpoq
Nunatsinni nutaanik mittarfiliortiternissamut danskit aningaasaleeqataaniarnerat ajunngisaarnertut isigineqassaaq - ajuallatsitsiniarnertut isigineqarnani.
Venstremeersoq Marcus Knuth taama erseqqissaavoq. Lars Løkke Rasmussenillu nunatsinni mittarfiliortiternermut danskit aningaasaleeqataanissaannik neqerooruteqarniarnerata Naalakkersuisuni politikkikkut eqqissiviilliuutaanera ajusaarnarnerarpaa.
- Isumaqarpunga Danmarkimi Kalaallit Nunaannilu politikkikkut aalajaatsumik ingerlatsisoqarnissaa tamanit kissaatigineqartoq, aamma mittarfiliortiternissamik suliniutit isumaqatigiinngissutaanerat soorunami ajuusaarnartippara, Marcus Knuth KNR-imut oqarpoq.
Kalaallit politikerii peqataanissamut kaammattuuteqareerput
Danskit naalagaaffiata nunatsinni attaveqarnermut aningaasatigut peqataanissaa pissusissamisoorsoraa.
Danmark Kalaallit Nunaallu naalagaaffeqatigiimmata, niuernikkut suleqatigiinneq annertooq pioreermat, kiisalu Folketingimut ilaasortat Aaja Chemnitz Larsenip (IA) Aleqa Hammondillu (NQ) Danmarkip nunatsinni inuussutissarsiutitigut suliniutinut aningaasaliinissaanik arlaleriarlutik kaammattuuteqareermata, Marcus Knuth oqarpoq.
AAMMA ATUARUK Danskit mittarfiliortiternernut akuunissaat Løkkep uppernarsaraa
- Isumaqanngilluinnarpunga danskit tungaannit pinngitsaaliiniarluni akuliuttoqartoq. Kalaallimmi aalajangiineri Kalaallit Nunaanni sumut ingerlariaqqinnissatsinnut tunngaviupput, tamannalu danskit naalagaaffiata danskillu suliffeqarfiisa suleqatigineqarsinnaannginnerinik kinguneqartariaqanngilaq.
Kinap ingalassimaniarnera ilumuunnginnerarpaa
Dansk Folkepartiimeersoq Søren Espersen naapertorlugu, danskit naalagaaffiata mittarfiliortiternermut akuuniarnera Kalaallit Nunaata Kinamik aningaasalersuititsinissaata pinngitsoortinnissanik siunertaqarpoq. Tamannali Marcus Knuthip ilumuunnginnerarpaa.
- Oqarusunngilanga Kina ingalassimaniarlugu taamaaliortoqartoq. Suliassaqarfinni taama amerlatigisuni qanittumik suleqatigeereerluta attaveqarnermut tunngatillugu aamma suleqatigiinnissarput pissusissamisoorluinnartuusoraara.
AAMMA ATUARUK Løkkep neqerooruteqarneratigut Kina ingalassimaneqassaaq
Kinamiulli Kalaallit Nunaannik soqutiginninnerannik ernumassuteqarneq Venstremi politikkikkut isumaliutigineqartoq nassuerutigaa.
- Kinamiut qanorpiaq siunertaqarnerat soorunami ernumanartoqartipparput. Tamatuma saniatigut aamma isumaqarpunga suliassaqarfinni Naalagaaffeqatigiinnermut tamarmut naleqqutinngitsumik pisussaaffiliisinnaasunik Kinamiut pittuisumik isumaqatigiissuteqarfiginissaat mianersuunneqartariaqartoq, Marcus Knuth oqarpoq.