Olsvig: Arnanut persuuttaasarneq akuererusunngilarput
Persuttaasarneq utoqqatsissutissartaqanngisaannassasoq, kikkullu tamarmik persuttarneqanngitsumik inuuneqarnissaminnut pisinnaatitaaffeqartut, Isumaginninnermut, Ilaqutariinnut, Naligiissitaanermut Inatsisinillu Atuutsitsinermut naalakkersuisup Sara Olsvigip ulloq pillugu oqaaseqarnermini oqaatigaa.
Nunatsinni arnat inersimasut 62 procentii piffissap ingerlanerani persuttarneqartarsimasut misissuinerit takutimmassuk, oqariartuut taanna pingaaruteqartoq, naalakkersuisup oqaatigaa:
- Persuttaasarneq inuiaqatigiinni akuererusunngilarput. Nunatsinni arnat 62 procentii piffissap ingerlanerani persuttarneqartarsimanerisa kisitsisitaat qaffasippallaarujussuarput. Tamatuma takutippaa, persuttaanermik akiuiniarneq aamma arnat persuttarneqartarnerannik annikillisaaneq suli ukkatariuassagipput, Sara Olsvig, tusagassiuutinut nalunaarummi ilaatigut oqarpoq.
AAMMA ATUARUK Kalaallit nakuuserfigineqartartut Danmarkimiittut ikiuiniarfigineqalersut
Naalakkersuisut persuttaasarneq akiorniarlugu 2014-imiit 2017-imut periusissiamik iliuusissatullu pilersaarummik saqqummiussisimanerat, Olsvigip ilanngullugu tikkuarpaa, persuttaasartunut katsorsaanissamik neqeroorutissamik piviusunngortitsisoqarsimanera ilaatigut tikkuarlugu, soorlu aamma arnanut qitornanullu persuttagaasimasunut nuna tamakerlugu qimarnuik katsorsaaviutigisup pilersinneqarsimanera taagaa.
- Tassunga ilaatillugu qulakkeerneqassaaq neqeroorutit pioreersut tunngavilersoqqinneqarnissaat aamma ineriartortinneqarnissaat. Tamanna ilaatigut qimarnguinnut atatillugu atuuppoq, taamaasilluni arnanut aamma meeqqanut persuttarneqarsimasunut suliaat pingaarutillit tunngavissikkumallugit, Isumaginninnermut naalakkersuisoq Sara Olsvig oqarpoq.
AAMMA ATUARUK Canadami arnanut annersaasarnermut akerliussutsimik takutitsitsut
Naligiissitaanermut Siunnersuisoqatigiinni allaffimmi pisortaq Inge Olsvig Brandt naapertorlugu arnanut persuttaasarneq nunatsinni suli ajornartorsiutaaqaaq.
Taamaammat siunnersuisoqatigiit arnanut persuttaasarneq akiorniarlugu oqalliseqatigiinnissamut Nuummi Katuami ullumi qaaqqusipput.
- Qanoq inerneqassanersoq oqaatigisinnaanngilara, kisianni uani oqallinnermi soqutiginartua tassaavoq siullerpaamik angutit peqatigalugit arnanut persuttaasarneq akiorniarlugu oqallitsitsineq ingerlasussaammat, pisortaq Inge Olsvig Brandt oqarpoq.
Oqallinnerup saniatigut ilaatigut anersaakkut ineriartorneq pillugu saqqummiisoqassaaq taavalu aamma isiginnaartitsisartoq Miki Jakobsen aliikkusersuissaaq.
Naligiissitaanermut Siunnersuisoqatigiit aaqqissuussaat, tamanut ammasoq, Nuummi Katuami nal. 14:00 - 17:15 pissaaq.