Nunatta uranisiortunut ilanngunnera Vittusip nuannaarutigaa

Naqqiut: Allaaserisami allakkaluarpugut Atomimik nukissiorneq pillugu nunat tamalaat nakkutilliisuutitaanut nunarput maanna pisortatigoortumik ilaasortanngortoq, tamannali eqqunngilaq. Nunap ilaanut nunatta nangaassutaasa ilaata atorunnaarsinneqarnissaat matumani pineqarpoq. Kukkunerput ajuusaarutigaarput.

Atomimik nukissiorneq pillugu nunat tamalaat nakkutilliisuutitaanut, IAEA-mut, ilaasortat Østrigip illoqarfiisa pingaarnersaanni Wienimi ataatsimeersuarneranni, Vittus Qujaukitsup isumaqatigiissutinik atsiugaqarneq nalunaarutigaa.

-Nunatta tutsuinartumik sinaakkutissaqarnissaa tassuuna aqqutissiuunneqarmat, taanna pisarialerujussuuvoq, taamaattumik tatiginassutsitsinnut aamma minnerunngitsumik isumannaatsumik aaqqissuussisoqarnissaa qulakkeerniarlugu ersarissumik najoqqutassaqarnissarput pingaaruteqarpoq, Vittus Qujaukitsoq oqarpoq.

Vittus Qujaukitsup allakkat atsiorneqarsimasut IAEA-p qullersaanut Yukiya Amanomut ataatsimeersuarnermi tunniuppai. 

Ernumaneq pisariaqanngitsoq

Inatsisartut upernaarmanna ataatsimiinneranni atomimik nukisisiorfimmi ajutooratarnissamut ikiorneqarsinnaaneq pillugu aalajangersagaq qinngulanilinnillu isumannaallisaaneq pillugu aalajangersagaq akuerineqarmata, nunarput isumaqatigiissutinik atsiugaqarsinnaanngorpoq.

Uranimik piaanerup avatangiisinut sunniuteqarsinnaanera ernummatigineqarnera pisariaqanngitsoq, Vittus Qujaukitsoq isumaqarpoq.

- Aalajangersakkap nunatsinnut atortussanngortinneqarnera iluaqutaasussaavoq, taamaasilluta nalorninaatsumik sinaakkutissanik atugassaqartitsilernerput innuttaasunik, avatangiisinut peqqinnissutsimullu qulakkeerinninniaavoq.

Nunarput isumaqatigiissutinik atsiugaqaraluarpoq piaalernissamulli aqqut takivoq. 

Inatsisartut isumaqatigiissutinut allanut ilaalernissamut isummernissaasa saniatigut uranimik piaanissap inuiaqatigiinnut sunniutigiumaagai misissorneqassapput avatangiisinullu sunniutai nalilersorneqassallutik.

- Taakkua suliarineqareersimatinnagit piiaasoqarnissaanik akuerineqarnissamut qinnuteqaat tunniunneqarsinnaanngilaq, taamaattumik inatsisit naapertorlugit suliap ingerlateqqinneqarnissaa naatsorsuutigisariaqarpoq, Vittus Qujaukitsoq oqarpoq