Venstre: Tapiissutit tulluarnerusumik agguaanneqartassapput
Venstrep isumaginninnermut nunamilu namminermi pissutsinut oqaaseqartartua, Carl Holst, taama oqarpoq.
Tamannalu pissutigalugu Københavnip Kommunianut tapiissutaasartut assigiinngitsut marluk katillugit 58 millionit koruuninik aningaasartaqartut danskit naalakkersuisuisa aappaagumit unitsinniarpaat.
- Tapiissutit tunniuttakkavut kommuninut aningaasatigut ajornartorsiuteqarnerpaajusunut tunniukkusuppagut. Københavnip Kommunia taakkununnga ilaanngilaq, kommunilli allat taamatut inissisimapput. Isumaginninnikkut suliassat ilarpassui kommuninit pisussaaffigineqarput, namminerlu iliuuseqarnissamut periarfissaqarfiunngitsuni tapersersuerusuppugut, Carl Holst KNR-imut taama oqarpoq.
Aningaasaliissutit pineqartut ilaatigut kalaallit imigassamik ajornartorsiuteqartut Frederiksberg Centerimi katsorsarneqartarnerisa kalaallillu arnat ajornartorsiuteqartut Kofoeds Skolekkoortumik najugaqaqatigiiffiata "Imeq"-p aningaasalersorneqarnerinut atorneqartarput.
Tapiissutaasartut peerniarneqarnerat ilaatigut Københavnip borgmesteriuneranit Frank Jensenimit Kofoeds Skolellu pisortaanit Robert Olsenimit isornartorsiorneqarpoq.
Aamma atuaruk Kalaallit ajornartorsiuteqartut tapiissutinik ileqqaarfigineqartut
Carl Holstilli erseqqissaatigaa, atuarfiit nutarterneqarnerinut haalimillu skøjtertarfimmik nutaamik sanaartornissamut ilaatigut 1 milliard koruunit Københavnip Kommuniata immikkoortissimagai.
- Tamakku tamarmik pitsaasuupput. Københavnilli Kommuniata aningaasatigut allaanerusunik periarfissaqarneranik takutitsiinnarput, Carl Holst oqarpoq.
Taarsiullugu tapiissutaasartut satspuljemit aningaasaliissutaasartunut katersorneqassapput, taakkulu oktobarip novembarillu qaammataanni politikkikkut isumaqatigiinniartoqarneratigut isumaginninnikkut suliniutinut agguaanneqartussaassallutik. Danskit naalakkersuisuisa tassunga atatillugu ilisimatitsissutigaat Danmarkimi kalaallinut inooqataanikkut ajornartorsiortunut suliniut immikkut isiginiarneqarnissaat kissaatigineqartoq.
Aamma partiit allat allaanerusumik pingaarnersiuiniaraluarpataluunniit kalaallinut inooqataanikkut ajornartorsiortunut iluaqutaanissaat Carl Holstip ilimagaa.
- Kalaallit inooqataanikkut ajornartorsiortut sammineqarnerat siammasimmat tapersorneqarsinnaassasoq isumaqarpunga. Isumaqatigiinniarnermili nammineq isuma pingaarnerutinneqartarpoq, tunngavilersorneqarluni allanillu isumaqataaffigineqarnissaa neriuutigineqartarluni, Carl Holst taama oqarpoq.
