Kalaallit ajornartorsiuteqartut tapiissutinik ileqqaarfigineqartut

Kalaallinut Københavnimiittunut inuuniarnikkut annertuumik ajornartorsiuteqartunut suliniutit arlaqartut matuneqaratarsinnaapput, naalakkersuisummi kommunimut tapiissutaasartoq peerniarmassuk.
Foto: Arkiv
septembarip 13-at 2016 16:00
Nutserisoq Connie Fontain

Taarsiullugu aningaasat pilersaarutinut suliniutinullu assigiinngitsunut aningaasaliissutineersut nutaamik agguataarneqassasut naalakkersuisut isumaqarput.

Tamannalu arlalinnit isornartorsiorneqarpoq.

Københavnimi overborgmesteri Frank Jensen assut naammagittaalliorpoq.

Isumaginninnermut ministerimut Karen Ellemannimut allagaqarluni isornartorsiuivoq naalakkersuisut suliniutinut assigiinngitsunut illoqarfimmi inuuniarnikkut ajornartorsiornerpaanut tapiissutaasartut peerniarmatigit.

Tamakkununnga ilaapput kalaallit inuuniarnikkut assut ajornartorsiuteqartut, Kofoeds Skolemi ikiorneqartartut, pisortaq Robert Olsen oqarpoq.

- Arnanut kalaallinut ajornartorsiuteqartunut illoqatigiiffik "Miteq" Kofoed Skolemit ingerlanneqartoq eqqornerlunneqassaaq.

Aammattaaq Frederiksberg Centerimi katsorsaavik kalaallinut imerajuttunut sammititaq tapiissutit peerneqarpata matuneqariaannavoq.

Naalakkersuisut piumasartik pippassuk Københavnip kommuniata katillugit 58 millioner koruunit annaassavai.

Taarsiullugu naalakkersuisut neriorsuutigisaattut pilersaarutinut suliniutinullu assigiinngitsunut aningaasat taakku ikineqassapput Danmarkimilu tamarmi kalaallinut ajornartorsiuteqartunut ikiorsiissutigineqarlutik.

Kofoeds Skolemi pisortaq Roberty Olsen naapertorlugu taamaaliorneq tassaavoq assammik tuniseriarluni aappaanik arsaarinninneq.

- Suliniuteqartoqarpoq allat aningaasanik ikinnernik pisussanngorlugit, kalaallillu ajornartorsiuteqartut ajornerusumik sullinneqalerlutik, Robert Olsen oqarpoq.

Københavnip kommuniani ulluni makkunani aappaagumut missingersuutit suliarineqalertuttorput, taamaalillunilu aamma Kofoeds Skolemut Fredriksbergcenterimullu aningaasaliissutissat allatigut nassaarineqassanersut misissorneqarlutik.