Uuliasiornissamut akuersissutit tunniunneqarput
- Akuersissuteqarnitsigut neriuutigaarput imartatsinni uuliamik gassimillu pitsaassutsimigut annertussutsimigullu niuerutigineqarsinnaasumik nassaarnissamut qanilliallannissarput, Inuussutissarsiornermut Aatsitassanullu Naalakkersuisoq, Ove Karl Berthelsen oqarpoq.
Akuersissutinik tunniussineq Naalakkersuisunit isumakulunnartoqartinneqanngilaq, innersuussutigineqarlutik Cairn Energyp 2010-mi uuliasiorluni qillerineri sillimaniarnikkut avatangiisillu illersorniarlugit upalungaarsimaniarnikkut pilersaarutit maleqqissaarneqarsimammata.
- Qillerinerit ingerlaneranni paasivarput, Nunatsinniit avatangiisit illersorniarlugit, isumannaallisaanikkut kiisalu teknikkikkut upalugaarsimanikkullu suleriaatsit atortullu maleruaqqusagut malinneqarsimasut, Ove Karl Berthelsen oqarpoq.
Nunat tamalaat uuliamik maqisoortoqarnissaanik sillimaniarnermi maleruaqqusaat naapertorlugit nunani tamalaani misilittagalimmik suliffeqarfimmik maqisoortoqassagaluarpat pingasoqiusamik suleriarnissamik upalugaarsimareerrtussamik isumaqatigiissusiortoqareersimavoq.
Umiarsuarnut talittarfiup piareersimanissaanut ilanngullugu nunani allaniit timmisartumik 36 tiimit iluanni tikissinnaasunik piareersimasuuteqartoqarpoq.
Ukioq manna qillerinerni suliffissat kalaallinik suliffigineqarsinnaasut 50-iussasut naatsorsuutigineqarput. Taakkulu akileraarutitigut isertissinnaasaat 50 millioni koruuniussasut ilimagineqarluni. Tamassuma saniatigut illoqarfinni suliffeqarfiit sullissinerminnut iluanaarutigisinnaasaat 150 millioni koruuniussasut ilimagineqarpoq.
Taakkua saniatigut Cairn Energymit Nuna Oil-ip suliniutaannut atatillugu 300 millioni koruunit taakkununnga tunniutissavaat, soorlu aamma siorna taamaaliortut.
