Uuliap aqqutissaa assortuussutaasoq Canadap taamaatiinnaraa
Uuliap aqqutissaata Nothern Gateway-ip sananeqarnissaa Canadami naalakkersuisut maanna allanngortinneqarsinnaanngitsumik itigartitsissutigaat.
Nothern Gateway sullulissuuvoq 1177 kilometerisut takitigisoq. Tassuuna uulia Albertamiit sineriamittuumut Kitimamut assartortussaagaluarpaa, tassanngaanniillu umiarsuarnut oliamik assartuutinut uulia usingiarneqartussaagaluarluni. Tamatuma kingunerisussaagaluarpaa oliamik assartuussuit ukiut tamaasa 300-it tamaanaqquttarnissaat.
Aamma atuaruk Canadami uuliap aqqutissaa assortuussutaasoq
Sullulissuaq uuliap aqqutissaa ukiut qulit ingerlaneranni assortuussutaasimaqisoq 2014-imi canadami naalakkersuisunit sananeqarnissaa akuersissutigineqarpoq.
Kisianni taamani akerlilersuinerit sakkortusinerupput. Ingammillu eqqillit Gitgat allallu sullulissualiornissamut akerlilersuisimapput.
Taanna erlinnartuutitut isigisat aqqusaarlugit sananeqartussaasimagaluarpoq, soorlu orpippassuit Bjørneskov aqqusaarlugit. Aamma tatsinik sinerissallu imartaanik mingutsitsisinnaavoq eqqillit inuuniutaat takornariartitsisarnerit aalisartitsisarnerillu siunissaarullugit.
Aamma atuaruk Nunap inoqqaavisa piumasaqaatitik saqqummiuppaat
Sanaartornermi suliffissat pilersitsisussat utaqqiisaaginnarput, nunap inoqqaavisali pinngortitamillu illersuiniaqatigiit pinngortitaq piujuaannartussatut isigivaat - nukissiuutinillu ataavartunik pilersitsinissaq piumanerullugu.
Taamatullu isiginnittaaseq ajugaavoq.
Ministeriunerup Trudeaup maanna nalunaarutigaa Nothern Gateway sananeqassanngitsoq, uuliamillu assartuussuit British Columbiap imartaatigoortarnissaat unitsikkallarneqarluni.
Naalakkersuisulli tamatumunnga ilutigitillugu sullullit allat marluk sananeqarnissaat akuersissutigaat taamaattumillu akerlilersuinerit ingerlaannarlutik
