Nunap inoqqaavi piumasaqaatitik saqqummiuppaat
Ukioq 2014 Canadamut soqutiginassaqaaq, aatsitassalerinermut uuliasiornermullu tunngatillugu soqutiginassalluni.
Aatsitassalerinermut, uuliasiornermut gassimillu qalluisoqarsinnaanissaanut tunngatillugu nunap inoqqaavi, indianerit naggueqatigiillu Inuit isummaminnik ilaatigut sakkortuumik saqqummiussisalersimapput, tassami piumasaqaatitimmi aallaavigalugit iliuuseqartoqartariaqartoq taakku isumaqarput.
Naggueqatigiimmi Inuit indianerillu suleqatigiinnarnagit, naggueqatigiilli Inuit indianerillu piginneqataaffigisaannik pisuussutinik uumaatsunik iluaqutiginnittoqartariaqartoq
aatsitassalerisut uuliasiortitseqatigiiffissuillu maanna ilisimalerpaat.
Uuliamut sullulik aqqutissaq Northerne Gateway matumani assersuutissaqqippoq. Sulluliammi taassuma sananeqarsinnaanissaa, Canadap nukissiuuteqarnermut aqutsisoqarfiata sapaatip-akunnerata siuliani aalajangerpaa.
Uulia nunap immikkoortuani Albertami qallorneqartup sulluliakkoortillugu nunap immikkoortuanut British Columbiami Kitimatimit nunanut allanut taamaasilluni assartorneqarsinnaanngussaaq.
Ilumullimi naammassineqarsinnaanersoq apeqqutaalerpoq, sulluliassarmi naggueqatigiit indianerit assigiiinngitsut aqqanillit nunaasigut ingerlaartussatut naatsorsuutigineqarpoq, piviusunngorsinnaanissaanullu aqqut suli takeqaluni. Sulluliamik sanasoqarsinnaanissaanut aalajangiinerup atorunnaarsinneqarnissaa pillugu avatangiisinik illersuiniaqatigiit eqqartuussivitsigut suliarisassanngortippaat, eqqartuussiviit qullersaannut allaat suliarisassanngortinneqarsinnaanissaa eqqarsatersuutigineqarluni.
