Qulaarpaa Uranip Naalakkersuisoqatigiit suleqatigiikkunnaarsissinnaagai
Naalakkersuisoqatigiit isumaqatigiissutaat nutaaq qularnartumik tunngaveqarpoq.
Tassami uran pillugu apeqqummi Siumut Inuit Ataqatigiillu avissaaqqaqaat.
Inatsisip atuutilersinneqarnissaanut Siumup sivisuumik sulivoq, Kuannersuarmi aatsitassarsiorniarluni suliniut annertooq piviusunngusssammat.
Aamma atuaruk Qulaarpaa Kuannersuarni suliniutissaq naalakkersuisooqatigiit misilittarneqaatigissagaat
Killormuuanik Inuit Ataqatigiit uranimik piaanngilluinnarnissap atuutilernissaa pingaartippaa.
Uran pillugu isumaqatigiinnginneq nipangiunneqarallarpoq, isumaqatigiinngitsoqarnera isumaqatigineqarluni.
Uran pillugu isumaqatigiinnginnerli teqeqqumi nueqqajaavoq, taamaanneralu naalakkersuisoqatigiinnermik ajalusoorutaasinnaalluni.
Paasisat
Kuannersuarni aatsitassanik piaaneq piviusunngorpat aatsitassarsiorfimmi 735-nik sulisoqassasoq GME neriorsuivoq nunatta karsianut 400 million kr-nik ukiumut akileraaruteqartassalluni.
Politikkikkut naliliisartartoq aamma Ilisimatusarfimmi tusagassiuutilerinermik immikkoortortaqarfimmi pisortaq, Naja Paulsen taama isumaqarpoq,
Aammami naalakkersuisoqatigiit uranimut politikkiat sunaanersoq nalunarpoq.
Naalakkersuisut uran pillugu qangali isummiussartik aalajangiusimavaat, naalakkersuisoqatigiilli nutaat isumaqatigiissutaanni erseqqissaatigaat, IA aamma Partii Naleraq uranimik piiaanngilluinnarnissaq aalajangiusimagaat.
- Naalakkersuisoqatigiittut suleqatigiinneq ulorianartoq, Paulsen naliliivoq
Naja Paulsenimit tikkuarneqarpoq, GME piianissamik qinnuteqarpat , IA imaluunniit Siumut tunniutiinnartariaqassasut tamannalu politikkikkut aporaannermik kinguneqassasoq.
- Isumaqatigiissut eqquutinneqanngippat, naalakkersuisoqatigiikkunnaarnermik kinguneqarsinnaavoq qinersisoqarnissamillu nalunaaruteqartoqarluni, Naja Paulsen taama naliliivoq.
KNR TV-ikkut oqalilluni aallakaatinneqartartumi Qulaarpaami naalakkersuisoqatigiit isumaqatigiissutaat nutaaq aamma uranimut apeqqut unnugu sammineqassaaq.
Qulaarpaa unnugu arfineq pingasunut aallakaatinneqassaaq - qallunaatuumut toqqaannartumik nutserneqarnera KNR 2-mi tusarnaarneqarsinnaavoq.
Aamma atuaruk Naalakkersuisoqatigiilersut Qulaarpaami sammineqassapput
