Umimmaat takussaajunnaarneranut isummat assigiinngillat
Umimmaat Kangerlussuup eqqaaniit ungavariartornerannut takornariat pisuupput, taama Kangerlussuarmi inuussutissarsiutigalugu piniartut pingasut nalunaarput.
- Nunap timaani inupparpassuaqalernikuugami, takornariat, ilisimatuullu aqunneqarnatik nunap timaanut erniorfiullu nalaanulluunniit angalaannaavilernikuugamik. Taamatullu bussit sermersuup tunganut uteqattaaginnaavikkamik, nuna immikkoortinnikuugaluarpaat piniarfigeqqusaanngitsoq. Karsten Lings piniartoqatini Amasa Olsen Jan Petersenilu sinnerlugit oqarpoq.
Illua tungaaniilli Greenland Outdoorsimik piginnittup takornariartitsisartullu, Jens-Pavia Brandip takornariakittarnera pillugu, taamatut uparuaaneq isumaqatiginngilaa.
- Ajornartorsiutaanera takorloorsinnaanngilara. Takornariat amerlanersaat bussimik sermersualiartarmata. Tassani soorunami nipiliortarput uumasullu qimaatissinnaasarlugit, nunamili takornariakittarpoq. Taamaammat oqarsinnaanngilanga tamanna ajornartorsiutaasoq, Jens-Pavia Brandt oqarpoq.
Takornariartitsinermut isummat assigiinngitsut
Umimmaat uterteqqinniarlugit Kangerlussup kujataata kangiani Naalakkersuisoqarfimmiit umimmanniarfigeqqujunnaarpaat.
Taamaattorli taassuma eqqaani nunami angalasoqarpallaarnera tammajuitsussarsiniarlunilu piniartoqartarnera pissutaalluni umimmaat eqqissitinneqanngitsut Karsten Lings oqarpoq.
- Tamanna kangiatungerput tammajuitsussarsilluni piniarnermut ammarneqarpoq, sivitsorneqarlunilu qaammatinik marlunnik. Qamutinik motoorilinnik sisamanik assakaasulinnik, qamuteralannik qimussimillu piniariaqqusaagami. Soorunami umimmaat utinngitsooramik itigarput. Karsten Lings oqarpoq.
Aamma atuaruk Umimmanniapiluttoqartarneranut allannguisoqassamaarpoq
Takornarialerisoq Jens-Pavia Brandt tammajuitsussarsilluni umimmanniartarnerni takornariat akornusersuinerinik misigisaqarsimannginnerarpoq, siunnersuuteqarporli piniariaatsit allanngornerisigut umimmaat ajoqusersorneqarunnaarsinnaasut.
- Umimmaat amerlassusaannut akornusiinngikkaluarluni qimaatitsinngikkaluarlunilu tammajuitsussarsilluni umimmanniartoqarsinnaakuttoorpoq. Angallatit umiatsiaaqqalluunniit atorneqarsinnaapput imaluunniit qaqqakkut pisuttoqarsinnaavoq, ATV-lli atornagit, Jens-Pavia Brandt oqarpoq.
ATV-nut aaqqiisoqarli
Karsten Lings ukiukkut ATV-t atorlugit piniariartarpoq, isumaqarporli inuusuttut Kangerlussuup eqqaani ATV-nik sumi tamaani ingerlaartarnerat ajoqutaasinnaasoq. Taamaammat siunnersuuteqarpoq inuusuttut pinnguartarfimmik tunineqartuugunik iluaqutigissagaluaraat.
Siunnersuummullu tassunga Jens-Pavia Brandt isumaqataavoq, uumasut nunallu pissarititai ajoquserneqannginnissaat anguniarlugu.
Aamma atuaruk Kangerlussuarmi umimmanniarneq inerteqqutaalersinnaavoq
