Ukiortaami angalanerminut atatillugu akiitsoqarnini Kuupiup nassuerutigaa
Naalakkersuisuusartut aatsaat siullermeerlutik, Nunatta karsianut akiitsoqalinngitsut, Namminersorlutik Oqartussat kukkunersiuisuinit Inatsisartut kukkunersiuinermut ataatsimiititaliaanut nalunaaruteqarput.
Soorlu Naalakkersuisut siulittaasorisimasaat, Kuupik V. Kleist, Inuit Ataqatigiit, aamma Nunatta karsianut 25.000 koruuninik suli akilinngisaminik akiitsoqartoq oqaatigineqarluni.
Kuupik V. Kleist tamanna pillugu ima oqarpoq.
- Nunatta karsianut akiitsoqarlunga naatsorsuutigaara. Taama akiitsoqarninnut pissutaavoq, Naalakkersuisut siulittaasuattut angalanerma ilaani meeqqakka angalaqatigigakkit. Kukkunersiuisut akiitsoqarninnik oqarnerat apeqqusinngilara aamma isumaqarama suliassartik iluamik suliarisimagaat. Akiitsoqarninnut apeqqut uanga nammineerlunga akisussaaffigaara.
AAMMA ATUARUK Aleqap Nunatta karsia atornerlukkaa
Naalakkersuisut siulittaasorisimasaat Kuupik V. Kleist taama oqarpoq, nassuiaallunilu 25.000 koruuninik akiitsut qanoq pilersimanerannik.
- Dronningip ukiortaami ilassinninneranut atatillugu, meeqqakka angalaqatigaakka. Tassa aapparalu qaaqqusaagatta meeqqavut ilagissallugit aalajangersimavugut, tassalu akiitsut tassanngaanniit pinngorput, Kuupik V. Kleist oqarpoq, Aleqa Hammondilu pillugu ima oqarluni.
- Aleqa Hammondip akiitsui pillugit oqaaseqarnianngilanga, aamma Aleqa Hammondip uanga pillunga oqaaserisai oqaaseqarfiginianngilakka, Naalakkersuisut siulittaasorisimasaat, Kuupik V. Kleist, KNR-imut taama oqarpoq.
