Aleqap Nunatta karsia atornerlukkaa
Naalakkersuisut siulittaasuat Aleqa Hammond, Siumumeersoq, 106.363 koruunit 27 ørillu Namminersorlutik Oqartussanut taarsigassaqarsimavoq. Tamanna Kukkunersiuinermut Ataatsimiititaliap kukkunersiuisumit Inatsisartunit toqqarneqartumit misissuititsereernerani paasinarsivoq.
- (Timmisartumut) bilitsinik nammineq atugassanik pisinikkut akiligassat pinngorsimapput, tamatumani Siulittaasup ilaqutaasa bilitsiinut kiisalu akunnittarfimmiinnerannut aningaasartuutit Namminersorlutik Oqartussanit akilerneqarsimallutik, tassungalu ilanngullugu neriniartarfimmi minibarimilu il.il. aningaasartuutit akilerneqarsimallutik.
- Aammattaaq Namminersorlutik Oqartussat ilassinninnermut iniutaanni katerisimaarnernut akiliisoqarsimasoq ilisimatitsissummi allassimavoq, Kukkunersiuinermut Ataatsimiititaliaq tusagassiutinut allappoq.
Aleqa Hammondip akisussaaffik ingerlateqqikkaa
Pisumi ilungersunartumi pingaarnertut inuttaasup akisussaaffik akueraa, oqaatigaluguli kukkuneq billetsit pisiarineqarnerani pisimasoq.
- Ulluni taakkunani aallarfissanni atorfilittakka isumaqatigaakka ilaquttakka inniminniissutissagai. Akiligassallu angalatitsivimmit takkummata paasivara billetsit ataatsimut akilerneqarsimasut, Aleqa Hammond KNR-imut oqarpoq.
Uanili akiligassat billetsineersuinnaanngitsut pineqarput, aningaasallu atukkat amerliartuinnavissimapput.
Aleqa Hammondili pisoq aaqqinneqareersoq nassuiaatigaa.
- Aningaasat isumannaareerpakka, massakkullu suut tamarmik pissusissamisut ipput, Aleqa Hammond oqarpoq.
Aamma atuaruk Aleqap angalatitsivik pisuutikkaa
Akiliisitsiniarneq ajornakusoortoq
Aleqa Hammond akiliisinniarnera ajornaatsuinnaasimanngilaq. Aningaasanik atornerluineq Naalakkersuisut siulittaasuata 2013-imi apriilip qeqqani siulittaasunngorneranit aallartissimasoq, 2013-illu qeqqaniit 2014-ip qeqqanut arlaleriarluni akiligassat isumannaagassat akileqquneqartarsimasut, Kukkunersiuinermut Ataatsimiitsitaliap ilisimatitsissutigaa. Aatsaalli septembarip arfineq-pingajuani isumannaarneqarsimallutik.
Aleqa Hammond kukkunersiuisumit qulaajaaffigineqarnermi kingorna Kukkunersiuinermut Ataatsimiititaliamut nassuiaasariaqarsimavoq.
Kuupik aamma taarsigassaqartoq
Naalakkersuisut siulittaasuat kisimi taarsigassaqarsimanngilaq. Naalakkersuisut siulittaasorisimasaat Kuupik V. Kleist, IA-meersoq, aamma 25.034 koruuninik isumannaagassaqarpoq. Namminersorlutillu Oqartussat arlaleriarlutik isumannaaqqusarsimavaat.
Paasisat tunngavigalugit naalakkersuisoqarfinni allani assingusunik pisoqarnersoq pisoqarsimanersorlu kukkunersiuisumit Inatsisartunit toqqarneqartumit misissuisoqassasoq Kukkunersiuinermut Ataatsimiititaliap kissaatigaa.
Suliap ilungersunartuunera tunngaviusutullu isigineqartariaqarnera pissutigalugit suliaq pillugu Inatsisartunut immikkut ittumik ilisimatitsissuteqartoqassasoq ataatsimiititaliap aaliangerpaa.
