Kielsen: Tunuartitsineq pissusissamisoorpoq

Naalakkersuisut siulittaasuat angallannermut naalakkersuisoq oqarasuaatikkut soraarsippaa. Tunuartitsinerlu eqqartueqatigiittoqaqqaarnani ullormiit ullormut aalajangiunneqarpoq. Aalajangiipallannerlu pissusissamisoortoq, Naalakkersuisut siulittaasuat isumaqarpoq.

AAMMA ATUARUK Martha Lund Olsen oqarasuaatikkut naalakkersuisuujunnaarpoq

- Tassa pissusissamisut ingerlavoq. Naalakkersuisoq tamakkiisumik tunniussaqarsinnaanngippat, taava uanga pisussaafigivara naalakkersuisut siulittaasuattut isumagissallugu suliassara. Suliassartaalu uanga naammassivara, Naalakkersuisut siulittaasuat Kim Kielsen oqarpoq.

Angallannermut naalakkersuisuujunnaartup Martha Lund Olsenip kommuninut qineqqusaarnissaq ussernartorsiutigalugu Siumut Nuummi immikkoortortaani siulersuisuunerisa ataatsimiinneranni oqaatigimmagu, Naalakkersuisut siulittaasuannit oqarasuaatikkut aqaguani tunuartinneqarpoq. 

AAMMA ATUARUK Oqaloqatigeeqqaarnissaq naatsorsuutigisimagaluarpaa

Siulittaasorlu tunuartitsinini nalunaarutiginiarlugu tusagassiortunik sivitsunngitsoq katersortitsivoq. Martha Lund Olseni angalanini peqqutigalugu katersortitsinermi naajuussinnaasimanngilaq.

Sooq Martha Lund Olsen matumani peqataatinneqarsimannginnera pillugu siulittaasut KNR-imit aperaarput, ima akivoq:

- Tassa taanna aamma ajornanngilaq taama pissuseqarluni. Uani nalunaarutigineqarnera aalajangerneqarnerata kingornatigut avammut tusarliutissagaanni tassa uanga siulliusariaqarpunga. Sukkut tamani siammarterneqannginnissaa pinerullugu tassa taamatut nalunaarutigivara.

AAMMA ATUARUK Kielsenip Martha Lund Olsen tusagassiortunik katersuutsitsinermi inuulluaqquaa

Martha Lund Olsenip Kommuninut, Nunaqarfinnut, Isorliuneurusunut, Attaveqarnermut Ineqarnermullu Naalakkersuisuunermini qaammatini pingasunngungajappai. 

Martha Lund Olsen Kim Kielsen decembarip sisamaani 2014-imi siulittaasunngormalli naalakkersuisuni tunuartut arfineq-pingajoraat.