Tunngaviusumik inatsit avaqqunnagu piumasaqaateqarput
Taamaattoqarsimanerali inatsisilerituunit arlalinnit naalagaaffeqatigiinneq pillugu suliaqarsimasunit qularineqarpoq.
Inatsisilerituut isumaqarput naalagaaffeqatigiinneq pillugu inatsit ima katitigaatigisoq allaat tunngaviusumik inatsit iluarsaateqqinngikkaluarlugu Savalimmiut Kalaallit Nunaallu piumagaanni nammineernerulersinneqarsinnaallutik.
- Isumaga malillugu nunat taakku marluk Danmark avaqqullugu isumaqatigiinniarsinnaapput. Tunngaviusumik inatsit taamaaliornissamut akorngutaatikkaanni, tamanna politikkikkut aalajangernerusoq, naalagaaffiit innuttanut pisussaaffii pillugit ilisimasalik islandimiu Gudmundur Alfredsson aviisimut politikenimut oqarpoq.
Aamma atuaruk Naalagaaffeqatigiinni nunat ataatsimoorlutik isumaqatiginniartarnissaat pingaaruteqarpoq
Nunatsinni Namminersornissaq pillugu isumaqatigiinniaqataasimasoq, maanna politikikkut nalilersuisartoq atorfikkaajusimasoq Jakob Janussen, isumaqarpoq nutaamik eqqarsarnissamut periarfissaqartoq.
- Nunat taakku marluk nutaanik eqqarsartoqarnissaannik ersarissumik piumasaqarnerat nutaarsiassaavoq. Tupinnanngilarlu aningaasarsiorfigisartik pillugu tamanna eqqartulermassuk, Janussen oqarpoq.