Tunisassiorfiit sulisussaqannginnerinut politikkerit pisuusut
KNAPK aamma Sulisitsisut Hans Enokseni Aalisarnermut Piniarnermullu naalakkersuisunngorneranik pilluaqqusinerminni taama oqariartuuteqarput. Kattuffit taakku kissaatigaat aalisarnermut politikki patajaatsuusariaqartoq ataavartuusariaqartorlu.
- Suleqatigiilernissaq qilanaaraarput, aammali pilluaqqusinitsinnut ilaavoq ukiut sisamat ingerlanerini aalisarnermut naalakkersuisut tallimat akisussaaffimmi oqimaatsumi issiareersullu inissisimavimmi pineqartumi politikkikkut patajaanerusumik maanna ingerlasoqalissasoq neriukkatta, KNAPK Sulisitsisullu tusagassiuutinut taama allapput.
Aalisarneq nunatta inussutissarsiutaasa pingaarnersaraat, tassanilu politikkikkut eqqissisimanissaq aammalu inussutissarsiutip aningaasarsiornikkut piujuaannartitsinissaq tunngavigalugu patajaatsumik ingerlanissaa kattufiit kissaatigalu allapput.
Aalisarnermut politikki kukkusoq
Kattufiit isumaqarput Royal Greenlandip sulisussanik 30-inik tikisitsisariaqalernera kukkusumik aalisarnermut politikkeqarnermik aallaaveqartoq.
Ukiuni kingullerni umiatsiaararsorluni aalisarsinnaanermut, pingaartumik qaleralinniarusuttunut, akuersissuteqartarnerit pisimapput. Taamatullu politikkeqarneq kukkunerusoq oqariartuutigineqarpoq.
- Tamatuma kingunerisaanik nunami aalisakkanik suliarinnittussat ikinnerulersinneqarsi-mapput aalisariutillu pisariaqartunik inuttaasarsiornermi ajornartorsiulersimallutik. Tamanna pilersinnaanera pillugu aalisarnermik ingerlataqartut, suliniaqatigiiffiit aammalu tuniniaaviusumi inissisimasut qangaammalli mianersoqqusissuteqartarsimapput. Henrik Sandgreen aamma Henrik Leth allapput.
- Kukkusumik aalisarsinnaanermut akuersissutinik tunioraaneq peqqutigalugu aalisartut aningaasaqarnikkut ajornartorsiuteqartitaalerput, aalisakkanillu tunisassiorfiit qaaffasinnerusunik aningaasartuuteqartitaalerlutik nunamilu sulisussaqarniarneq taamaalilluni sanngiillisinneqarpoq.
- Nunami aalisakkerivinni sulisussaaleqisoqarneratigut aalisakkanik tigooraasinnaanerit ajornerulersinneqarput taamallu umiarsuarnik tunitsivinnik piumasaqalernernik kinguneqarluni, kattuffiit taama oqariartuuteqarput.
Allatut oqaatigalugu aalisartunik nutaanik apeqqusiinani akuersissuteqartarneq unittariaqartoq Sulisitsisut KNAPK-llu kissaatigaat.
Tamannami aamma maanna aalisarnermut naalakkersuisuusimalersup, Nikolaj Jerimiassenip, nassuerutigereerpaa oqarami akuersissutinik tunniussuiinnartoqarsinnaanngitsoq.
