Tuberkulosertut aatsaat taama ikitsigisut
Nappaat TB nunatsinni suli atugaavoq, akiorniarsarineqarporli, Nunarsuarlu tamakkerlugu peqqinnissaq pillugu suliniaqatigiiffissuup WHO-p ukiumoortumik TB-mut ulloritittagaanut, marsip ulluisa 24-annut atatillugu, nunat kattuffiillu tamarmik 2030 nallertinnagu peqatigiillutik TB-mik nungutitsiniarnissaannik, kajumissaarneqarput.
Nunatsinni Nakorsaaneqarfimmi peqqissaasutut siunnersorti Rikke Bruun de Neergaard tusagassiuutinut taama allaaserisaqarpoq.
AAMMA ATUARUK Tuberkulose suli ajornartorsiutaasoq
2016-imi TB-rtut ukiup siuliinut naleqqiullugit ikinnerupput, unammilligassalli annikitsutut nalilerneqassanngitsut, Rikke Bruun de Neergaardip oqaatigaa, nangillunilu:
- Nappaatip atugaanerata akuerineqarsinnaasumut killiffissaanut aqqut takeqaaq, nungutivinnissaanullu aqqut suli takinerulluni, peqqissaasutut siunnersorti oqarpoq.
AAMMA ATUARUK Tuberkulosemut akiuussutissaq ilisimagisamit pitsaanerusoq
Inigisani tattorliunneq, imeqarnermullu perusuersarfeqarnermullu tunngasut pitsaanngitsut nappaatip tuniluussinnaanera annertusisippaat.
- TB pillugu ajornartorsiutip peqqinnissaqarfimmit kisermaallugu aaqqiivigineqarsinnaannginnerata paasinissaa pingaaruteqarpoq. Nerisarlunneq, imigassamik atornerluineq, tupatorneq timillu nappaatinut akiuussinnaassusiata annikinnera TB-mik tunillatsinnissamut nappaateqalernissamullu qanillitsitsisarput, Rikke Bruun de Neergaard oqarpoq.
Kalaallit Nunaanni siorna 2016-imi TB-mik tuniluuttumik nappaatillit 61-iusut paasineqarpoq, ikiliartorpullumi. Tuberkulose.gl naapertorlugu 81-it 2015-imi TB-rtut 81-iusut paasineqarpoq, 2011-milu 112-iusimallutik.
