Trump isumaqatigiissummit COP 21-mit tunuartoq
Tuluit nutaarsiassaqartitsiviat Reuters, nutaarsiassaqartitsivik alla Axios innersuussutigalugu taama allaaserisaqarpoq.
USA-p Parisimi isumaqatigiissummit aninera, USA-mi tv-qarfissuup CBS-ip aamma allaaseraa, tusarfiit præsidentip Washingtonimi illorsuaneersut matumani innersuussutigineqarlutik.
USA-p isumaqatigiissummit aninissaanut aalajangernerup immikkuualuttortai, Trumpip aqutsisoqarfiani atorfilinnit aalajangiiffigineqaleruttortut tusarfiit oqaatigaat.
USA-p Parisimi isumaqatigiissummut peqataanissaanut Obamap præsidentiunerata nalaani aalajangerneqartoq taamaasilluni qatangiinnartinneqarpoq, isumaqatigiissutigineqartut USA-mit malinneqarnissaannut Obamap atsioqataanera taamaatiinnarneqartussanngorlutik.
Silaannaap annerpaamik 1,5 aamma 2 gradit akornanni ukiuni tulliuttuni qaffakkiartornissaa Parisimi anguniarneqarpoq. Taamatulli isumaqatigiissusiortoqarnera naammaqqajanngilaq, inatsisitigullu aamma pisussaaffiliinani.
Silap pissusiata allanngoriartornera asuli oqalunnerusoq, Kinamiillu nassaarineqarsimasoq, Trumpip siusinnerusukkut oqaatigereerpaa. USA-p Parisimi isumaqatigiissummit aninissaa qineqqusaarnermini aamma sioorasaarutigaa.
Nunat suliffissuaqarfiusut annerit arfineq-marluk, G-7-it, sapaatip-akunnerata siuliani ataatsimiipput, Parisimilu isumaqatigiissutigineqartoq Trumpip tassani isumaqataaffiginngilluinnarpaa. USA-llu isumaqatigiissummit aninissaa aalajangiiffigingajalernerarlugu.
Trumpip taama isummersornera nunat G-7-imi ilaasortat uggoraat.
- Canadami, Frankrigimi, Tysklandimi, Italiami, Japanimi Tuluillu Nunaanni naalakkersuinikkut siuttut, EU-llu præsidentiata siulittaasuatalu nalunaarutigaat Parisimi isumaqatigiissummi anguniarneqartut eqquutsinniarlugit sukataaruteqarniarlutik. Nunat G-7-imi ilaasortat Siciliami ataatsimeereernerminni inaarutaasumik oqaaseqaateqarnerminni taama naqissusiipput.