Trump naggueqatigiinnut inunnut tusarluarnanngilaq

Donald Trumpip præsidentimut qineqqusaarnermini Mexico killeqarfimmilu qarmarsualiortoqartariaqarnera eqqartortuarpaa. Taavalu aamma ammip qalipaataanik assigiinngisitsillunilu musliminik arnanillu asissuisarnera nunat inoqqaavisa eqqarsartaasaannut ungaseqisoq, Aqqaluk Lynge oqarpoq.

Aamma atuaruk Ilisimasalik: Trump præsidentinngussappat Issittumut sunniuteqartupilussuussaaq

Aamma atuaruk Alaskami senatorit Trump tapersersorniarunnaaraat

- Ilimagisariaqarparput naggueqatitta Alaskami aamma malugiumaaraat, tassami nalunanngilaq USA-p nunap inoqqaavisa pisinnaatitaaffii pillugit FN-ip aalajangersagaa maannakkut malissallugu ilungersuutiginavianngimmagu. Taamaattumik aarlerivugut, Aqqaluk Lynge oqarpoq. 

Trumpillu præsidentinngornerata kingunerisinnaavaa USA-p Issittumik ukiuni kingullerni ukkataqarnera atuukkunnaartoq, Aqqaluk Lynge naliliivoq.

Barack Obamap Amerikami præsidentini siullersaalluni Issittoq pillugu Alaska siorna tikeraarpaa.

Tikeraarneratalu kingunerisaanik naggueqatigiit Inunnut suliniutit assigiinngitsut aallartinneqarput, soorlu assersuutigalugu najugaqarfiiit silap pissusiata allanngoriartorneranit aarlerinartorsiortinneqartut sillimmaserneqarlutik.

Issittulli politikkikkut samminikinnerulersinnaavoq.

- Nalunanngilaq erniinnartumik unitsinneqartussaassapput. Allaqqussinnaanngilaq. Pissutsit allanngungaatsiassapput taamaattumillu naalarnilluta tusarnaartassaagut sumut ingerlasoqarnersoq. Uagut Nunatta politikkikkut inissisimanera aamma sissueqqissaartumik massakkut ingerlanneqartariaqalissavoq.